04.06.2026 | 16:48
Հայաստանի հրաշալի ծաղիկները Լատվիա և Նիդերլանդներ արտահանելու հարցն է այսօր քննարկվել․ Վասիլիս Մարագոս․ ՏԵՍԱՆՅՈւԹ
Արցախի գրավյալ տարածքներում ականի վրա պայթելու հետևանքով 10 ադրբեջանցի է զոհվել․ ադրբեջանական թալանը շարունակվում է
Քաղաքականություն
11.03.2021 | 15:15
Պատերազմի ավարտից հետո Արցախի գրավյալ տարածքներում շարունակվում են ականի վրա պայթելու հետևանքով մահվան դեպքեր գրանցվել ադրբեջանցի զինվորականների ու խաղաղ բնակիչների շրջանում։
Ադրբեջանի գլխավոր դատախազության վերջին տվյալներով՝ նոյեմբերի 10-ից մինչ օրս 10 խաղաղ բնակիչ է զոհվել ականի վրա պայթելու հետևանքով։
«Տարբեր աստիճանի վնասվածքներ էլ ստացել 11 քաղաքացիական անձ»,- գերատեսչությունից հայտնել են «Ինտերֆաքս»-ի ադրբեջանական ծառայությանը։ Իսկ ահա զինվորականների մասով թարմացված տվյալներ չկան։ Հիշեցնենք՝ փետրվարի սկզբին Գլխավոր դատախազության հրապարակած տվյալների համաձայն՝ ականի վրա պայթելու հետևանքով 5 զինծառայող էր զոհվել, 52-ը՝ վիրավորվել։
Նշենք, որ Ադրբեջանի իշխանությունները բավական խիստ հսկողություն են սահմանել ու տարբեր անցակետեր տեղադրել՝ բնակիչների մուտքը Արցախի գրավյալ տարածքներ թույլ չտալու համար։ Գրեթե ամեն օր ադրբեջանական մամուլում տեղեկություններ են հայտնվում տարբեր մարդկանց ձերբակալման մասին, որոնք փորձում են գնալ Արցախի գրավյալ տարածքներ։
Սա իշխանությունները բացատրում են անվտանգության նկատառումներով, քանի որ տարածքներն ականազերծված չեն։ Սակայն գլխավոր պատճառներից մեկն իրականացվող թալանն է, որը նոյեմբերի 10-ից ակտիվորեն սկսվել ու հիմա էլ շարունակվում է։ Որոշ տվյալներով՝ շատ դեպքերում այն կազմակերպվում է ոստիկանապետերի ու գործադիր իշխանության ներկայացուցիչների կողմից, որոնք մարդկանց տարբեր խմբերի ուղարկում են ականապատ տարածքներ՝ վտանգելով նրանց կյանքը։
Ի դեպ՝ բնակիչները ևս փաստում են, որ շատերն Արցախի գրավյալ տարածքներ են գնում հենց թալանի նպատակով։
«Кавказский Узел»-ի հետ զրույցում էլ Տերտերի շրջանի բնակիչներից Ալի Վելիևը նշել է, որ մարդիկ, գուցե, Թալիշ ու Մատաղիս գնում են՝ տարածքներն ուսումնասիրելու և այնտեղ տնտեսություն հիմնելու հեռանկարներըը գնահատելու համար։ Վելիևը նաև ասել է՝ համագյուղացիները խոսում են նաև այն մասին, որ շատերը գնում են՝ գյուղերը լքածների ունեցվածը սեփականացնելու ու թալանի համար։
Էմմա Չոբանյան
