Քաղաքականություն
10.03.2021 | 16:40
Ադրբեջանի նախագահ Իլհամ Ալիևը նախօրեին Թուրքիայի Ազգային մեծ ժողովի պատվիրակության անդամների հետ հանդիպմանը կրկին խոսել է Արցախյան պատերազմի ընթացքում Թուրքիայի ցուցաբերած աջակցությունից ու «Զանգեզուրի միջանցքից»:
«Քաղաքական ու բարոյական աջակցությունը, որը ցուցաբերվեց իմ թանկագին եղբայր Ռեջեփ Թայիփ Էրդողանի կողմից, իհարկե, մեզ շատ ոգևորեց։ Պատերազմի օրերը ևս մեկ անգամ ցույց տվեցին, թե որքան են մեր ժողովուրդները կապված միմյանց, ինչ սիրով ու հարգանքով են միմյանց վերաբերվում»,- ասել է Ալիևը ու շնորհակալություն հայտնել օգնության համար։
«Պիտի ասեմ, որ պատերազմի ժամանակ մամուլը, Թուրքիայի բոլոր հասարակական կառույցները Ադրբեջանին մեծ աջակցություն ցուցաբերեցին։ Այսօր մեր տարածաշրջանում նոր իրավիճակ է ստեղծվել, նոր իրականություն։ ԼՂ հակամարտությունը մնացել է պատմության մեջ, ավարտվել է։ Մենք այսօր պիտի նայենք ապագային ու մտածենք տարածաշրջանում համագործակցության մասին։ Կարևոր հարցերից մեկը տրանսպորտային ծրագրերի իրագործումն է, «Զանգեզուրի միջանցքի» բացումը։ Համոզված եմ, որ միացյալ ուժերով կհասնենք դրան»,- հայտարարել է Ադրբեջանի նախագահը։
Նշենք, որ ՀՀ վարչապետի խոսնակ Մանե Գևորգյանն ավելի վաղ նշել էր, որ Հայաստանի, Ռուսաստանի և Ադրբեջանի առաջնորդների միջև ձեռք բերված տարածաշրջանային ապաշրջափակման պայմանավորվածություններում որևէ «միջանցքի» հարց չի քննարկվում։
«Ներկայում փորձագիտական խմբերը կենտրոնացած են բոլոր հնարավոր ուղղություններով ենթակառուցվածքների ֆիզիկական հնարավորությունների և տեխնիկական վիճակի գնահատման աշխատանքների վրա: Որևէ «միջանցքի» կամ «միջանցքի կարգավիճակի» հարց չի քննարկվում: Նոյեմբերի 9-ի համատեղ հայտարարության մեջ խոսվում է միայն մեկ՝ Լաչինի միջանցքի մասին: Հայաստանի Հանրապետության տարածքով որևէ միջանցքի վերաբերյալ նոյեմբերի 9-ի հայտարարության մեջ չի ասվում: Խոսքը տարածաշրջանի տրանսպորտային կոմունիկացիաների վերաբացման մասին է»,- ասել էր վարչապետի խոսնակը։
Էմմա Չոբանյան
