Քաղաքականություն
08.03.2021 | 20:22
Վրաստանի ընդդիմությունը պահանջում է ազատ արձակել պատգամավոր, «Միասնական ազգային շարժում» կուսակցության ղեկավար Նիկա Մելիային ու արտահերթ խորհրդարանական ընտրություններ նշանակել, հակառակ դեպքում մարտի 20-ին ընդդիմադիրները լայնածավալ բողոքի ցույցեր կանցկացնեն։ Այս մասին երկուշաբթի օրը լրագրողներին հայտնել է ընդդիմադիր «Միասնական ազգային շարժում» կուսակցության առաջնորդներից մեկը՝ Խաթիա Դեկանոիձեն՝ իր ընդդիմադիր գործընկերների հետ խորհրդակցությունից հետո, գրում է ՏԱՍՍ-ը։
«Եթե «Վրացական երազանքը» չհամաձայնի արտահերթ խորհրդարանական ընտրություններ անցկացնելու հետ, ազատ չարձակի քաղբանտարկյալներին, այդ թվում նաև Նիկա Մելիային, ապա մարտի 20-ին մենք շատ մեծ բողոքի ցույցեր կանցկացնենք, որը կդառնա Վրաստանի քաղաքացիների պատասխանը իշխանությունների լկտիությանը»,- հայտարարել է Դեկանոիձեն։
Հիշեցնենք՝ Վրաստանում քաղաքական ճգնաժամը շարունակվում է փետրվարի 23-ից, երբ ոստիկանությունը կուսակցության գրասենյակում ձերբակալել է Մելիային ՝ 40 հազար լարի (ավելի քան 12 հազար դոլար) գրավը չվճարելու մեղադրանքով՝ 2019-ի հունիսին տեղի ունեցած հանրահավաքում անկարգությունների դեպքերի առթիվ։ Ձերբակալվելուց առաջ ՝ փետրվարի 18-ին, վարչապետ Գեորգի Գախարիան հրաժարական է տվել ՝ քաղաքական գործչի կալանքի հարցում իր թիմի հետ ունեցած տարաձայնությունների պատճառով:
Տաթև Ֆռանգյան
