03.11.2026 | 11:22
Ուկրաինական ԱԹՍ-ները հարվածել են Յարոսլավլի նավթավերամշակման գործարանին․ վիրավորվել է երկու աշխատակից
Իշխանությունը չի ուզում հեռանալ, մենք պետք է կոտրենք իր ոտքերը, հենարանները. Վազգեն Մանուկյան. ՏԵՍԱՆՅՈՒԹ
Քաղաքականություն
12.02.2021 | 15:51
Եթե նոյեմբերի 9-ի հայտարարությամբ պատերազմը դադարել է, ապա Սյունիքին վերաբերող գաղտնի հուշագրով Ադրբեջանը շարունակում է գրավել Հայաստանը։ Այսօր հրավիրված հանրահավաքի ժամանակ հայտարարեց ընդդիմության ժամանակավոր կառավարության վարչապետի թեկնածու Վազգեն Մանուկյանը՝ մեկնաբանելով օրերս հրապարակված գաղտնի փաստաթուղթը։
«Պատերազմը դադարեցվեց նոյեմբերի 9-ի հայտարարությամբ՝ այն պայմանով, որ դրանում նշված կետերը կատարվում են ու պատերազմը դադարում է, կողմերը մնում են իրենց տեղերում կանգնած։ Բայց պարզվեց, որ բացի եռակողմ հայտարարությունից՝ կա նաև գաղտնի ստորագրված մի փաստաթուղթ՝ 6 կետանոց, որով հակառակորդը շարունակում է առաջ շարժվել՝ նոր տարածքներ գրավելով արդեն Հայաստանի տարածքում։ Գրված էր, որ զորքերը կանգնած են մնում իրենց դիրքերում, բայց մեր զորքը Զանգելանից ու Կուբաթլուից դեպի Սյունիք նահանջեց Նիկոլ Փաշինյանի հրամանով»,- ասաց Մանուկյանը։
Նրա կարծիքով` իշխանությունն ԱԱԾ-ի տարածած հաղորդագրությամբ փորձում է արգելել լրատվամիջոցներին հայտնել ճշմարտությունը Սյունիքի մասին։
«Ոնց որ 44 օր պատերազմի ժամանակ մեզ համոզում էին, որ մենք հաղթելու ենք, ու մենք հավատում էինք, որովհետև փակել էին մամուլը, հիմա էլ նույնն են անում՝ փակում են մամուլը»,- ասաց Մանուկյանը՝ հավելելով, որ այս ամենը վկայում է, որ գաղտնի փաստաթուղթը միակը չէ ու բացի դրա 6 կետերից՝ կան էլի պայմանավորվածություններ։
Նա նաև նշեց, որ եթե նման փաստաթուղթ բացահայտվեր տարիներ առաջ, ժողովուրդը դուրս կգար փողոց, բայց այսօր ժողովուրդն այնքան հարվածներ ստացավ, որ կարծես թե համակերպվում է ամեն ինչի հետ:
«Զարթնե՛ք, մեր հայրենիքը մեր աչքի առջև կործանում են մինչև վերջ»,- սթափության կոչ արեց Մանուկյանը։
«Այսպիսի դավաճանություն, որ երկրի ղեկավարը ժողովրդի մեջքի հետևում ծախի պետություն, չէինք տեսել… Մեզ պետք է համաժողովրդական շարժում, որպեսզի կարողանանք ազատվել այս իշխանությունից: Իշխանությունը կամավոր չի հեռանալու, մենք պետք է կոտրենք իր ոտքերը, իր հենարանները»,- ընդգծեց Մանուկյանը:
Մանրամասները՝ տեսանյութում:
