Մանվել Գրիգորյանի և Նազիկ Ամիրյանի գործերը կքննվեն մեկ վարույթում

Երևանի ընդհանուր իրավասության դատարանի Կենտրոնի նստավայրում, դատավոր Մնացական Մարտիրոսյանի նախագահությամբ շարունակվեց ԵԿՄ նախկին նախագահ Մանվել Գրիգորյանի գործով դատական նիստը:

Հիշեցնենք՝ Գրիգորյանի մահվանից հետո, նրա ներկայացուցիչներն առարկել են քրգործը կարճելու դեմ, նշելով, որ պետք է հասնեն արդարացման:

Այսօր դատավորը բարձրացրեց  Ամիրյանի և Գրիգորյանի 2 գործերը միացնելու, մեկ վարույթում քննելու հարցը:

Դատախազը չառարկեց, մինչդեռ պաշտպանական կողմը ժամանակ էր պահանջում, դատավորի առաջարկին՝ նիստը մի քանի ժամով ընդմիջելու, պաշտպանները առարկեցին, նշելով որ տեխնիկական խնդիրներ կարող են առաջանալ:

Ինչևէ դատարանը որոշեց վարույթները միացնել, ինչից հետո Գրիգորյանի պաշտպանները դատավորին ինքնաբացարկ հայտնեցին:

Նշենք, որ այս գործերը առանձնացվել էին, քանի որ Գրիգորյանը առողջական խնդիրների պատճառով պարբերաբար բացակայում էր նիստերից:

Հիշեցնենք՝ Մանվել Գրիգորյանը մահացել է 2020-ի նոյեմբերի 19-ին: Նա մեղադրվում էր ապօրինի կերպով զենք-զինամթերք պահելու, ավելի քան 101 մլն դրամ յուրացնելու, ավելի քան 1 մլրդ դրամ հարկերի վճարումից խուսափելու, պետական միջոցներից ավելի քան մեկ մլրդ դրամ վատնելու և շորթմամբ 37 մլն դրամ արժողությամբ գույքի հափշտակություն կազմակերպելու համար: Նա մեղադրանքը չէր ընդունում: Մանվել Գրիգորյանը անազատության մեջ գտնվեց մեկուկես տարի: 2020 թվականի հունվարի 15-ին խափանման միջոց կալանքը փոխարինվեց չհեռանալու մասին ստորագրությամբ: Նա ուներ մի շարք առողջական խնդիրներ:

Նազիկ Ամիրյանը մեղադրվում է ամուսնու, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ ապօրինի կերպով իրենց պատկանող երեք տներում ռազմամթերք, պայթուցիկ նյութեր պահելու, ինչպես նաև տարբեր տեսակի հափշտակություններ կատարելու համար։