01.08.2026 | 23:46
Արման Ծառուկյանը հաղթեց երևանյան մենամարտում. ՏԵՍԱՆՅՈՒԹ
Ադրբեջանը 17 օտարերկրյա և ՀՀ 4 քաղաքացու նկատմամբ միջազգային հետախուզում է հայտարարել
Քաղաքականություն
25.01.2021 | 14:45
Ադրբեջանի գլխավոր դատախազությունը միջազգային հետախուզում է հայտարարել 17 իբր «վարձկանների» նկատմամբ, որոնք Արցախյան պատերազմում կռվել են հայկական Զինված ուժերի կազմում։ Այս մասին այսօր հայտարարել է Ադրբեջանի գլխավոր դատախազ Քյամրան Ալիևը, հաղորդում են տեղական լրատվամիջոցները։
«Գլխավոր դատախազությունը 62 քրեական գործ է հարուցել՝ կապված Հայաստանի ԶՈւ-ի կողմից «Ադրբեջանի դեմ սանձազերծված» պատերազմի ու դրա ընթացքում իրականացված այլ հանցագործությունների հետ։ 21 անձի նկատմամբ հայտարարվել է միջազգային հետախուզում, որոնց թվում են Հայաստանի 4 քաղաքացի և 17 օտարերկրյա վարձկան»,- ասել է Ալիևը գերատեսչության կոլեգիայի նիստում։
Նշենք, որ հետախուզում հայտարարված քաղաքացիների մասին կոնկրետ տվյալներ չեն հաղորդվում։ Պարզ չէ, թե ովքեր են «օտարերկրյա վարձկանները»։ Ըստ երևույթին, խոսքը տարբեր երկրներից Արցախյան պատերազմում որպես կամավոր մասնակցած սփյուռքահայերի մասին է, որոնց ադրբեջանական կողմը փորձում է ամեն կերպ ներկայացնել որպես վարձկանների։
Հիշեցնենք՝ օրերս էլ պարզ դարձավ, որ Ադրբեջանում քրեական գործ է հարուցվել Լիբանանի երկու հայազգի քաղաքացիների նկատմամբ, որոնք մասնակցել են Արցախյան պատերազին։ Խոսքը Հակոբ Թերզյանի ու Հակոբ Հաջիրյանի մասին է, որոնք մեղադրվում են ահաբեկչության, ապօրինաբար զենք կրելու, սահմանի անօրինական հատման, զինված ուժերի ստեղծման ու այլ հանցանքների մեջ։
Էմմա Չոբանյան
