08.05.2024 | 12:36
Իսրայելի և Գազայի հատվածի սահմանի անցակետը վերսկսել է աշխատանքը
Պարտված իշխանությունը պետք է հեռանա. ես չեմ սատարում որևէ ուժի. Աննա Գրիգորյան. ՏԵՍԱՆՅՈՒԹ
Քաղաքականություն
18.01.2021 | 12:54
ՀՀ ազգային ժողովի նոր պատգամավոր Աննա Գրիգորյանը, որը պատգամավորի լիազորությունները ստանձնելուն պես դուրս է եկել «Իմ քայլը» խմբակցությունից, ցանկանում է երկրում տեսնել միջանկյալ՝ տեխնոկրատների կառավարություն, սակայն այս պահին չի տեսնում այնպիսի մարդկանց, որոնք կարող են այդ կառավարությունը ձևավորել, չի սատարում ներկայում գործող որևէ քաղաքական ուժի: Աննա Գրիգորյանը նման տեսակետ հայտնեց խորհրդարանում լրագրողների հետ զրույցում:
Անդրադառնալով հարցին, թե ինչ քաղաքական օրակարգով է եկել խորհրդարան՝ նա ասաց. «Ես կարծում եմ, որ պատերազմում պարտված իշխանությունն անխուսափելիորեն պետք է հեռանա: Կարծում եմ, որ հնարավոր չէ այսօր կազմակերպել արտահերթ խորհրդարանական ընտրություններ: Շատ լարված է իրավիճակը, և հնարավոր են քաղաքացիական բախումներ, այդ առումով կարծում եմ, դեռ պետք է խուսափել արտահերթ ընտրություններ կազմակերպելուց»,-ասաց Գրիգորյանը:
Պատգամավորը կարծում է, որ անցումային կառավարության ձևավորումն այս պահին լավագույն տարբերակը կարող է լինել: Սակայն Գրիգորյանը սխալ է համարում այն մոտեցումը, որ երբ անհատը ցանկանում է, որ իշխանությունը հեռանա, միանգամից նրան համարում են Վազգեն Մանուկյանի կողմնակից:
Անդրադառնալով հարցին, թե արդյոք կիսո՞ւմ է «Հայրենիքի փրկության շարժման» քաղաքական օրակարգը՝ Գրիգորյան ասաց. «Ես չեմ սատարում այս պահին գործող որևէ քաղաքական ուժի, որևէ քաղաքական շարժման: Առավել ևս, որ ես չեմ տեսնում, որ լինեն հստակ զրույցներ՝ Հայաստանի ապագայի վերաբերյալ, լինի ճանապարհային քարտեզ, որտեղ հստակ կլինի, թե մեկ տարի հետո մենք որտեղ ենք հայտնվելու: Հետևաբար` ես այդ առումով չեմ կարող սատարել որևէ քաղաքական ուժի և անհատի»,-ասաց պատգամավորը:
Նա հստակեցրեց՝ միջանկյալ կառավարություն ասելով ի նկատի ունի տեխնոկրատների կառավարություն, մարդիկ, որոնք լավ գիտեն իրենց գործը, սակայն նա անհատների անուններ չնշեց, քանի որ այս պահին չի տեսնում այդպիսի մարդկանց:
«Հայկական օրակարգն այս պահին գերիների վերադարձն է իհարկե, Արցախի կարգավիճակը հարցը, Հայաստանի սահմանների անվտանգությունը, մասնավորապես Սյունիքի անվտանգությունը, որն ինձ համար խիստ էական է»,-ասաց Գրիգորյանը:
Պատգամավորը կարծում է, որ այս առումով հունվարի 11-ի բանակցությունները ցույց են տվել, որ Նիկոլ Փաշինյանը չկարողացավ սպասարկել ՀՀ-ի շահերը: Ըստ նրա՝ իշխանություններն այլևս ներուժ չունեն բանակցությունները շարունակելու և ռեալ արդյունքներ արձանագրելու:
Մանրամասները՝ տեսանյութում:
