04.05.2024 | 22:05
Պատգամավորները Վաշինգտոնում հանդիպել են ԱՄՆ ՄԶԳ կառավարչի փոխտեղակալ Ալեքսանդր Սոկոլովսկու հետ
2021 թվականի գլխավոր ֆինանսական փաստաթուղթը սոցիալական ուղղվածության է
Տնտեսություն
13.01.2021 | 20:30
ԱՀ պետական նախարար, ֆինանսների նախարար Գրիգորի Մարտիրոսյանը ֆինանսաբյուջետային և տնտեսական կառավարման հարցերի մշտական հանձնաժողովի համատեղ նիստում ներկայացրել է «ԱՀ 2021թ. պետական բյուջեի մասին» ԱՀ օրենքի նախագիծը:
Պետական նախարարը նախ անդրադարձել է ընթացիկ տարում Հանրապետությունում ձևավորված տնտեսական միջավայրին, նշելով, որ COVID-19 համավարակի և Ադրբեջանի կողմից սանձազերծված պատերազմը լուրջ հարված է հասցրել տնտեսությանը : «Ըստ մեր կանխատեսումների՝ 2020 թվականի համախառն ներքին արդյունքը կկազմի 293.5 մլրդ դրամ` հանգեցնելով շուրջ 15 տոկոս տնտեսական անկման»,- հավելել է Գրիգորի Մարտիրոսյանը:
Կատարված մակրոտնտեսական կանխատեսումների համատեքստում 2021 թվականի պետական բյուջեի ցուցանիշները ծրագրվել են եկամուտների գծով` 81 մլրդ 830.7 մլն դրամ, ծախսերի գծով` 124 մլրդ 851.2 մլն դրամ, դրա արդյունքում դեֆիցիտը կկազմի` 43 մլրդ 020.5 մլն դրամ: Պետական բյուջեի սեփական եկամուտները ծրագրվել են 17 մլրդ 50 մլն դրամի չափով՝ 2020 թվականի 56 մլրդ պլանավորված եկամուտների դիմաց: Այդ թվում հարկային եկամուտները և պետական տուրքերը կկազմեն 17 մլրդ դրամ, որի արդյունքում կանխատեսումային «Հարկեր/ՀՆԱ» հարաբերակցությունը կկազմի 7.6 տոկոս: Պետական նախարարը հույս է հայտնել, որ տնտեսական տարում հնարավոր է որոշակի ակտիվություն ապահովել: Լավատեսության հիմքը հարկային օրենսդրության փոփոխությունների նախագծի փաթեթն է, որ խորհրդարան է բերվել «ԱՀ 2021թ. պետական բյուջեի մասին» ԱՀ օրենքի նախագծի հետ:
Ներկայացնելով հիմնական ծախսային գերակայությունները՝ պետական նախարար, ֆինանսների նախարար Գրիգորի Մարտիրոսյանը նշել է, որ բնակչության կոմունալ ծառայությունների փոխհատուցման համար նախատեսվում է հատկացնել 12 մլրդ դրամ: 10 միլիարդ դրամի կապիտալ ներդրումներ են նախատեսվում, ինչի արդյունքում նախատեսվում են պատերազմական գործողությունների հետևանքով վնասված բազմաբնակարան բնակելի շենքերի, բնակելի տների, կրթական և առողջապահական օբյեկտների, ենթակառուցվածքների վերականգման ու վերանորոգման շինարարական ծրագրեր:
Փաստացի բյուջեի ծախսային կառուցվածքում ամենամեծ մասնաբաժին ունեցող ոլորտը սոցիալական պաշտպանության ոլորտն է, որին բաժին է ընկնում ընդհանուր ծախսերի մոտ 25.2 տոկոսը:
Որ տարվա գլխավոր ֆինանսական փաստաթուղթը սոցիալական ուղղվածության է՝ եզրափակիչ խոսքում վերահաստատել է պետական նախարարը՝ ընդգծելով պատերազմական գործողությունների հետևանքով ի հայտ եկած հիմնախնդիրների լուծման անհրաժեշտությունը:
