ԵՐԵՎԱՆԻ ԺԱՄԱՆԱԿՈՎ․ Ե՞րբ է Փաշինյանը պատերազմից հետո բաց հանդիպում ունեցել ժողովրդի հետ․ ուրեմն վախենում է. Դավիթ Հակոբյան․ ՏԵՍԱՆՅՈՒԹ

«Անկեղծ ասած՝ Փաշինյան-Պուտին-Ալիև հանդիպումից ոչ մի ակնկալիք էլ չունեի: Երեք երկրների ղեկավարները նոյեմբերի 9-ի հայտարարության շրջանակում բոլոր կետերի վրա ժամկետներ էին դրել, բայց գերիների փոխանակման, վերադարձի կետի հետ կապված ոչ մի ժամկետ չկար: Այդ կետը պետք է լիներ առաջինը, և մեր երկրի ղեկավարի կողմից պետք է պայման դրվեր՝ մինչև գերիների և դիակների ամբողջական փոխանակություն չլինի, մնացած կետերը չեն իրագործվի: Հայաստանի ղեկավարի համար մարդը արժեք չունի. արժեք ունի տարածքը, դիրքը, մնացած ամեն ինչ՝ բացի մարդուց»,- Factor.am-ի հետ զրույցում նման տեսակետ է հայտնում դերասան, ՀՀ վաստակավոր արտիստ Դավիթ Հակոբյանը:

Նա հարցնում է՝ ե՞րբ է Նիկոլ Փաշինյանը պատերազմից հետո բաց հանդիպում ունեցել ժողովրդի հետ: Ըստ նրա՝ եթե այդ հանդիպումը տեղի չի ունեցել, նշանակում է՝ վարչապետն ինչ-որ բանից վախենում է:

Դերասանն անդրադառնում է նաև այն փաստին, որ պատերազմում անհետ կորածի հորը սպառնում է ազատազրկում՝ 5-ից 10 տարի ժամկետով. վերջինն ավտոմեքենայով հարվածել էր ՀՀ ՊՆ դարպասին․ «Սա մեկնաբանության չի ենթարկվում, սա մարազմ է: Ես նորից ու նորից համոզվում եմ, որ մենք այլևս պետություն, իշխանություն չունենք, եթե ունենք, որտե՞ղ է փոխհարաբերվելու ճիշտ ձևը, ինչո՞ւ է բանը հասնում նրան, որ անհետ կորածի ծնողը նման բան է անում»:

Մեր զրուցակցի համոզմամբ՝ մեզ հարկավոր է անցումային վիճակ, որը գործող իշխանությունն ապահովել չի կարող. «Ասում են, թե այս իշխանությունը թավիշով, սիրով եկավ, ո՛չ, ատելությամբ եկավ: Դրսի ուժերի հետ բանակցելու համար մեզ նոր դեմքեր են պետք»:

Հարցազրույցն ամբողջությամբ՝ տեսանյութում:

Աննա Բաբաջանյան