19.12.2025 | 12:53
Ինչում է ադրբեջանցի դատախազը մեղադրում Ռուբեն Վարդանյանին. մանրամասներ դատական նիստից
Պետք է մի անգամ ֆունդամենտալ այդ խնդիրը լուծենք, մաքրենք և մաքուր էջից սկսենք. Կարեն Կարապետյան
Տնտեսություն
18.01.2018 | 11:54
ՀՀ Կառավարության այսօրվա նիստում վարչապետ Կարեն Կարապետյանը հերթական հանձնարարականները տվեց: Ըստ վարչապետի՝ տարբեր ոլորտներում կուտակվել են իրավաբանական և ֆիզիկական անձանց կողմից հարկերի, տուրքերի և այլ վճարների պարտավորություններ:
Հաշվի առնելով, որ այդ ապառքների, տույժերի և տուգանքների հավաքագրման խնդիրները, չնայած նախկինում կատարված միջոցառումներին, լուծում չեն ստացել, անհրաժեշտ է մշակել համակարգային մոտեցում, ինչի արդյունքում հնարավոր կլինի լուծել կուտակված պատավորությունների խնդիրը:
«Ելնելով վերոնշյալից՝ հանձնարարում եմ մեկամսյա ժամկետում Տարածքային կառավարման և զարգացման, գյուղատնտեսության, ֆինանսների նախարարներին, Պետական եկամուտների կոմիտեին և մարզպետներին ամփոփել և կառավարության աշխատակազմ ներկայացնել գույքահարկի, հողի հարկի, ապառքների և այլ պարտադիր վճարների մասով ունեցած պարտավորությունների մարման լուծման մեխանիզմները»,- հանձնարարեց Կարեն Կարապետյանը:
Վարչապետը Երևանի քաղաքապետ Տարոն Մարգարյանից հետաքրքրվեց. «Պարոն Մարգարյան, նման խնդիր ձեզ մոտ կա՞»: Տարոն Մարգարյանը հայտնեց, որ վարձակալության բազայում ունեն նման խնդիրներ, ապա խնդրեց իրենց էլ ներառել այդ քննարկումներում:
«Խնդիրը ինչի՞ մասին է, որպեսզի ճիշտ ընկալվի: Մենք պետք է մի անգամ ֆունդամենտալ այդ խնդիրը լուծենք, մաքրենք և մաքուր էջից սկսենք: Ունենք տարիներով կուտակված նախկին պարտքեր, մենք առաջարկելու ենք ճկուն մեխանիզմներ, որպեսզի այս տույժ ու տուգանքներն էլ անընդհատ չգան և վերջում դառնան անլուծելի խնդիր: Այդ իսկ պատճառով այստեղ պետք է շատ փաստարկված, տրամաբանական, գուցե և համարձակ առաջարկ արվի»,- նշեց Կարեն Կարապետյանը:
