16.06.2026 | 18:10
ԵՄ-ում քննարկել են ՀՀ-ին աջակցության հարցը // Թրամփն ու Զելենսկին հանդիպել են․ ԼՈՒՐԵՐ
Դատավորը Ներսես Պողոսյանին չթույլատրեց հայտարարություն անել․ նիստը հետաձգվեց
Հասարակություն
12.01.2018 | 14:33
Դատավոր Տաթևիկ Գրիգորյանը չթույլատրեց Ժիրայր Սեֆիլյանի գործով ամբաստանյալ Ներսես Պողոսյանին հայտրարությամբ հանդես գալ։ Այն բանից հետո, երբ Ժիրայր Սեֆիլյանն ու Գևորգ Սաֆարյանը լքեցին դատական նիստերի դահլիճը, Ներսես Պողոսյանը ձայնի իրավունք խնդրեց։ Դատարանը, սակայն, այդ պահին խոսքը տվեց փաստաբաններին։ Փաստաբանները միջնորդեցին, որպեսզի փորձագետներ հրավիրվեն դատարան և հարցաքննվեն, քանի որ գործում կան բազում անհամապատասխանություններ։
Դատավորը նախ ընդմիջում հայտարարեց, որպեսզի մեղադրող կողմը կարողանա միջոնորդության մասին կարծիք հայտնել։ Մեղադրող դատախազները չառարկեցին, բայց դատավորը միջնորդությունը մերժեց։ Իսկ հետո հայտարարեց, որ նիստը հետաձգվում է։ Ներսես Պողոսյանը դատավորին դիմելով ասաց․ «Հարգելի դատարան, բայց ես հայտարարություն ունեի անելու»։ Տեսնելով, որ դատավորը չի լսում, արձագանքեց․ «Այ քեզ բան»։
Նշենք նաև, որ այսօրվա նիստին պետք է հարցաքննվեր Գևորգ Սաֆարյանը, սակայն նրա՝ դահլիճը լքելուց հետո, դատավորը հայտարարեց, որ Սաֆարյանի հարցաքննությունն ավարտված է համարվում։ Ժիրայր Սեֆիլյանի, Գևորգ Սաֆարյանի և «Սասնա ծռերի» դատավարություններին չմասնակցելու բոյկոտի պատճառը 20 օրից ավելի հացադուլ հայտարարած Արմեն Բիլյանի և Սմբատ Բարսեղյանի՝ «Արմավիր» ՔԿՀ տեղափոխվելու չիրականացված պահանջն է։
Լիլիթ Շաբոյան
