Քաղաքականություն
09.01.2018 | 15:39«Ալեքսանդր Արզումանյանը և՛ ընդդիմադիր եղած ժամանակ, և՛ այսօր, և՛ նախկինում՝ որպես արտաքին գործերի նախարար, և՛ որպես պատգամավոր եղել է և կա Հայաստանի Հանրապետության պետական շահին ծառայող քաղաքացի: Յուրաքանչյուր քաղաքացի, եթե գտնում է, որ իր նկատմամբ վճիռը իրականացվել է ոչ օրինական, կարող է դիմել նաև եվրոպական համապատասխան կառույցներին»,- արձագանքելով այժմ Դանիայի Թագավորությունում Հայաստանի արտակարգ և լիազոր դեսպան, նախկինում ընդդիմադիր գործիչ Ալեքսանդր Արզումանյանի կողմից ՄԻԵԴ ներկայացրած դիմումին՝ ասաց ԱԺ փոխնախագահ Էդուարդ Շարմազանովը:
Նշենք, որ հունվարի 11-ին Մարդու իրավունքների եվրոպական դատարանը կհրապարակի «Ալեքսանդր Արզումանյանն ընդդեմ Հայաստանի Հանրապետության» գործով դատավճիռը: Հայցը վերաբերում է փողերի լվացման գործով Ալեքսանդր Արզումանյանին՝ որպես նախկին արտգործնախարար և «Քաղաքացիական անհնազանդություն» քաղաքական շարժման առաջնորդ, կալանքի տակ պահելու հանգամանքին: Արզումանյանը ձերբակալվել է 2007 թվականի մայիսին և կալանավորվել: Դատարանը կայացրել է նրան կալանավորելու մասին որոշում՝ հանցանքի ծանրության և իրավապահներից թաքնվելու, արդարադատությանը խոչընդոտելու և կրկնահանցագործության վտանգի հիման վրա:
Ալեքսանդր Արզումանյանի պնդմամբ՝ խախտվել են ազատության և անձնական անձեռնմխելիության, ինչպես նաև ողջամիտ ժամկետում դատաքննության իրավունքները: Շարմազանովը չցանկացավ մեկնաբանել, եթե ընդդեմ Հայաստանի վճիռ լինի, ճիշտ կլինի՞ , որ ներկայումս ՀՀ դեսպան Ալեքսանդր Արզումանյանը վերցնի որպես փոխհատուցում իրեն տրվող գումարը:
Մանրամասները՝ տեսանյութում:
