Փաշինյանը թաքուն չի ստորագրել այդ փաստաթուղթը. Արմեն Խաչատրյան. ՏԵՍԱՆՅՈՒԹ

Նիկոլ Փաշինյանը թաքուն չի ստորագրել այդ փաստաթուղթը: Իհարկե թիվ մեկ պատասխանատուն ինքն է, սակայն կա նաև կառավարություն: Այս մասին ԱԺ-ում լրագրողների հետ զրույցում ասաց «Իմ քայլը» խմբակցության պատգամավոր Արմեն Խաչատրյանը:

«Եթե գործեինք այն տրամաբանությամբ, որ կա մեկ պատասխանատու, ապա չէր լինի կառավարություն և նախարարներ, մի հոգու կնշանակեին, որն ամբողջ ոլորտները կղեկավարեր: Ոլորտային պատասխանատուներից էլ շատ բան է կախված: Ինչ վերաբերում է նրան, թե մեղավոր է-մեղավոր չէ, մեղավորության հարց չկա»,- նշեց պատգամավորը:

Դիտարկմանը, որ մարդիկ պահանջում են Նիկոլ Փաշինյանի հրաժարականը, իսկ նա նախարարներին է փոխում, Խաչատրյանն ասաց. «Այո՛, մարդիկ կան, որ պահանջում են վարչապետի հրաժարականը, բայց ինչո՞ւ չեք ասում, որ այդ մարդիկ մեր հանրության որ չափն են կազմում: Միշտ էլ կլինեն մարդիկ, որոնք կպահանջեն այս կամ այն գործչի կամ պաշտոնյայի հրաժարականը: Բայց պետք է ասեմ, որ այդ մարդիկ չեն ներկայացնում ամբողջ հանրության դեմքը, հրաժարական պահանջելը որոշում է ժողովուրդը»:

Արմեն Խաչատրյանի դիտարկմամբ՝ այն փոփոխությունները, որոնք կատարվում են կառավարությունում, անհրաժեշտ են ներկա պահին, և դրանք պետք է իրականացվեն օր առաջ:

Մովսես Հակոբյանի՝ ասուլիսում հայտնած տեղեկությունների վերաբերյալ Խաչատրյանը նշեց, որ նրա հնչեցրած հայտարարությունները նախ պետք է ստուգվեն: «Պետական և ռազմական գաղտնիքի հրապարակման առերևույթ դեպք եմ նկատում: Չի կարելի քաղաքական կամ այլ շահագրգռվածությամբ երկրի անվտանգությունը վտանգի տակ դնել և ռազմական գաղտնիք հրապարակել. դա անթույլատրելի է: Իսկ թե նրա ասածներից որ մասն է ճիշտ, որը՝ իրականության հետ ընդհանրապես կապ չունի, շատ կարճ ժամանակում կպարզվի»,- նշեց Խաչատրյանը:

Նրա խոսքով՝ Հակոբյանի հայտարարությունն այն մասին, որ վարչապետը պատերազմի երրորդ օրը դադարեցրել է ԶՈՒ լրահամալրումը, օբյեկտիվ իրականության հետ կապ չունի:

Մանրամասները՝ տեսանյութում: