2019 թվականի ընթացքում զինված հակամարտությունների գոտում մեծացող երեխաների թիվը ավելացել է 11 միլիոնով։ Այս մասին հայտնել է Save the Children միջազգային կազմակերպությունը, գրում է DW-ի ռուսական ծառայությունը։
Աշխարհում յուրաքանչյուր 5-րդ երեխան ապրում է զինված հակամարտությունների պայմաններում։ Այսպիսին են Save the Children-ի «Պատերազմն ընդդեմ երեխաների» զեկույցի տվյալները, որը հրապարակվել է նոյեմբերի 20-ին։
Զեկույցից բխում է, որ 2019 թվականին 426 միլիոն երեխա է ապրել զինված հակամարտությունների գոտիներում, սակայն տարվա ընթացքում այդ ցուցանիշն աճել է 11 միլիոնով և հասել բացարձակ ռեկորդի:
Անցյալ տարի երեխաների համար առավել վտանգավոր երկրներն էին Աֆղանստանը, Կոնգոյի Դեմոկրատական Հանրապետությունը, Իրաքը, Եմենը, Մալին, Նիգերիան, Սիրիան, Սոմալին, Սուդանը, Հարավային Սուդանը և Կենտրոնաաֆրիկյան Հանրապետությունը: Համաճարակը միայն վատթարացնում է իրավիճակը՝ աճող աղքատության և առողջապահական համակարգերի գերբեռնվածության պատճառով, ասվում է զեկույցում։
Save the Children-ը համաշխարհային հանրությանը կոչ է արել «դադարեցնել երեխաների դեմ պատերազմը»: Կազմակերպության տարեկան զեկույցը հրապարակվել է ՄԱԿ-ի Գլխավոր ասամբլեայի կողմից հաստատված Երեխաների համաշխարհային օրվա կապակցությամբ:
Տաթև Ֆռանգյան
