11.09.2026 | 17:21
Մինչև փոփոխություն չլինի՝ այդ մարդիկ մնալու են ու տանջվեն Բաքվի բանտերում. Կարապետյանը՝ գերիների մասին. ՏԵՍԱՆՅՈՒԹ
Իշխան Սաղաթելյանի՝ «Ես քո հետ կգամ, բայց խոստանո՞ւմ ես, որ վաղը կգաս Նիկոլի հետևից» արտահայտությանը չընդդիմացած ԱԱԾ փոխգնդապետի նկատմամբ ծառայողական քննություն է իրականացվում
Հասարակություն
19.11.2020 | 22:56
Ազգային անվտանգության ծառայության փոխգնդապետ Համբարձում Սարգսյանի նկատմամբ ԱԱԾ-ում ծառայողական քննություն է սկսվել՝ կապված նրա գործառնական պարտականությունների կատարման հետ։ Այս մասին Factor.am-ի գրավոր հարցմանն ի պատասխան՝ հայտնում են ԱԱԾ քննչական դեպարտամենտից։
Նշենք, որ Համբարձում Սարգսյանն այն փոխգնդապետն է, որը նոյեմբերի 11֊ին գնացել էր Դաշնակցության գրասենյակ՝ ՀՅԴ ԳՄ անդամ Իշխան Սաղաթելյանին բերման ենթարկելու համար։ ՀՅԴ անդամները նկարահանել էին գործընթացը, որի ժամանակ Իշխան Սաղաթելյանը, դիմելով փոխգնդապետ Համբարձում Սարգսյանին, ասել էր. «Ես քո հետ կգամ, բայց խոստանո՞ւմ ես, որ վաղը կգաս Նիկոլի հետևից»:
Փոխգնդապետը, Սաղաթելյանի ձեռքը սեղմելով, չէր ընդդիմացել, իսկ նկարահանողի հարցին էլ՝ «վաղը փոխգնդապետ Սարգսյանի հետ գնալու ենք Նիկոլին ձերբակալելո՞ւ», արձագանքել էր՝ «այո»։
ԱԱԾ֊ից Factor.am-ին հաստատել են, որ փոխգնդապետի հենց այս պահվածքն է պատճառ դարձել, որ ծառայողական քննություն սկսվի։ Մեր հստակեցնող հարցերին ի պատասխան՝ կառույցից փոխանցել են, որ փոխգնդապետը շարունակում է հանդիսանալ ԱԱԾ զինծառայող և քրեական գործ հարուցելու անհրաժեշտություն չկա։
Իշխան Սաղաթելյանի ձերբակալման տեսանյութը՝ ստորև.
Նարեկ Կիրակոսյան
