Հասարակություն
18.11.2020 | 19:14Առավոտյան 7-ից 16 հատ 50 տեղանոց և 17 հատ 23 տեղանոց ավտոբուս է մեկնել Արցախ։ Թե օրվա ընթացքում քանի ավտոբուս է մեկնում, հստակ չէ․ հերթական ավտոբուսին սպասելիս արցախցիներն ասում էին՝ ինչքան գնացողները շատ լինեն, այնքան ավտոբուսները կավելացնեն։ Կանգնած չեն թողնի ոչ մեկին, այդպես են ասել Արցախի շտաբից։
Իսկ գնացողների թիվն ամեն օր ավելանում է։ 31-ամյա Անի Տոնյանը 3 երեխաների հետ է Արցախից եկել Հայաստան, ամուսնուն այս օրերին չի տեսել՝ սահմանին է եղել։ Հիմա էլ եկել էր երեխաներին տեսնելու, գնալու որոշումը տեղում են ընդունել։
Գեղամ Միքայելյանն էլ է մեկ օր առաջ Արցախից եկել, բայց ոչ թե ընտանիքին տանելու, այլ միայն կնոջը՝ տունը պետք է նորոգեն, հետո երեխաներին ու թոռներին կտանեն։
Տարբեր են նրանց հասցեները, ոմանք այլևս հասցե չունեն։
Երևան էլ տարբեր շրջաններից են եկել՝ Արցախ գնալու համար։ Արցախի Հանրապետության Աշխատանքի, սոցիալական և բնակարանային հարցերի նախարար, Հայաստանում Արցախի կառավարության օպերատիվ շտաբի աշխատանքները համակարգող Միքայել Վիրաբյանը Factor TV-ի հետ զրույցում ասում է՝ այսուհետ արդեն բոլոր մարզկենտրոններից դեպի Արցախ ուղևորվող տրանպորտ կլինի։
Այսօր 5-րդ օրն է, ինչ կանոնավոր կերպով կազմակերպվում է արցախցիների վերադարձը տուն։ 5 օրերին 3․500-ից ավելի արցախցի արդեն իր հողում է։ Միգրացիոն ծառայության տվյալներով՝ պատերազմի օրերին Արցախից Հայաստան է տեղափոխվել 85․000-ից ավելի մարդ։ Վերադառնալու համար հատուկ գրանցումներ պետք չեն՝ պարզապես առավոտյան 7-ին պետք է լինել նշված տեղում։
Ոմանք մի քանի ժամ է, ինչ սպասում են, բայց չեն դժգոհում․ ասում են՝ ճամփան երկար է, կարևորը լավ տեղ հասնեն։ Սպասելիքներն էլ զգացողությունների նման հակասական են։ Մի մասն ասում է՝ վախը կա, մյուս մասը հակադարձում է՝ «բա մենք վախեցո՞ղ ենք»։
Հարյուրավոր գնացողների մեջ ժպտում են միայն երեխաները՝ ուզում են վերադառնալ և ուրախ են, որ արդեն գնում են։
Մանրամասները՝ տեսանյութում։
Իրինա Մկրտչյան
