17.09.2026 | 20:48
«Հայփոստի» թափանցիկության խնդիրը․ տնօրենի 3.6 մլն դրամ վարձատրություն և չբացահայտվող տվյալներ
Վրաստանը կոչ է անում ուժեղացնել ԱՄՆ ներկայությունը Հարավային Կովկասում․ DW
Քաղաքականություն
18.11.2020 | 16:28
Վրաստանի իշխանությունները հանդես են գալիս Հարավային Կովկասում պաշտպանության և անվտանգության հարցերի շուրջ ԱՄՆ-ի հետ համագործակցության ամրապնդման և այս տարածաշրջանում ԱՄՆ ներկայացուցչության ուժեղացման օգտին: Այս մասին Վրաստանի վարչապետ Գիորգի Գախարիան հայտարարել է նոյեմբերի 18-ին Թբիլիսիում ԱՄՆ պետքարտուղար Մայք Պոմպեոյի հետ հանդիպման ժամանակ, գրում է DW-ի ռուսական ծառայությունը:
Վրաստանի կառավարության մամուլի ծառայության փոխանցմամբ՝ Գախարիան նշել է, որ երկու երկրների ռազմավարական գործընկերության հիմքում ընկած են այնպիսի արժեքներ, ինչպիսիք են ազատությունն ու ժողովրդավարությունը, ինչպես նաև ընդհանուր աշխարհառազմավարական շահերը: Նրա խոսքով՝ Թբիլիսին գնահատում է «ԱՄՆ-ի անփոփոխ աջակցությունը երկրի ինքնիշխանությանն ու տարածքային ամբողջականությանը»:
«Դուք շատ լավ գիտեք, թե որքան կարևոր է այս հարցը մեր երկրի համար, որի տարածքները գրավված են, քանի որ գրավող ուժերը դեռ տեղակայված են մեր հողում»,- շեշտել է Վրաստանի վարչապետը:
Իր հերթին, Մայք Պոմպեոն նշել է, որ ապագայում Ամերիկան կանի հնարավոր ամեն ինչ՝ Վրաստանի ժողովրդավարական ինստիտուտներն ամրապնդելու, երկրի եվրոպական և եվրատլանտյան ինտեգրման գործընթացներին աջակցելու համար:
Վրաստանի արտգործնախարար Դավիթ Զալկալիանին իր հերթին լրագրողների հետ զրույցում հայտարարել է, որ Պոմպեոյի հետ բանակցությունների ընթացքում քննարկվել է նաև կորոնավիրուսի համաճարակի հետ կապված իրավիճակը: Միևնույն ժամանակ, Վրաստանը հույս ունի դառնալ աշխարհում առաջին երկրներից մեկը, որը կստանա SARS-CoV-2 դեմ ամերիկյան պատվաստանյութը:
Տաթև Ֆռանգայն
