Հումորով ենք վերաբերվում. ՀՀԿ-ականները «Երկիր Ծիրանիի»՝ նախագահներին «մահապատժի» ենթարկելու ակցիայի մասին

Երեկ «Երկիր Ծիրանի» կուսակցությունը Հանրապետության հրապարակում ուշագրավ ակցիա իրականացրեց՝ այրելով Հանրապետության երեք նախագահների պատկերներով տիկնիկներն ու լուսանկարները, ինչպես նաև փոփոխված Սահմանադրությունը:

Ի՞նչ են մտածում այդ խորհրդանշական ակցիայի մասին իշխող Հանրապետական կուսակցության անդամները: ԱԺ ՀՀԿ խմբակցության պատգամավոր Կարեն Ավագյանը մեզ հետ զրույցում ասաց. «Ես «Երկիր Ծիրանիին» ընդհանրապես լուրջ չեմ վերաբերվում, ուր մնաց՝ իրենց գործողությունները մեկնաբանեմ»:

Տարեվերջյան այդ արտառոց ակցիայի կազմակերպիչների պնդմամբ՝ երեք նախագահներին մահապատժի էին ենթարկում իրենց կատարած հանցանքների համար: Ի՞նչ քայլեր են պատրաստվում իրականացնել «մահապատժի ենթարկված» նախագահ Սերժ Սարգսյանի հարազատ կուսակցությունում: Այս հարցին ի պատասխան՝ Աժ ՀՀԿ խմբակցության պատգամավոր Մարգարիտ Եսայանն ասաց. «Հանրապետական կուսակցությունը շատ լուրջ կուսակցություն է, ցանկացած խամաճիկային կուսակցության հանդեպ, նկատմամբ, ուղղությամբ որևէ քայլ չի ձեռնարկի: Հումորով ենք վերաբերում, մարդիկ են ինչ-որ ճաշակներ ունեն, ինչ-որ մղումներ ունեն, թող զբաղվեն ինչով, որ ուզում են: Մենք շատ ավելի լուրջ կուսակցություն ենք, որպեսզի զբաղվենք նմատատիպ խամաճիկ կուսակցություններով»:

«Երկիր Ծիրանիի» անդամներին իրենց վարքագիծը վերանայելու խորհուրդ տվեց ԱԺ ՀՀԿ խմբակցության պատգամավոր Կարինե Աճեմյանը՝ նշելով, որ, եթե ավագանի են ընտրվել կոնկրետ խնդիրներ լուծելու համար, ապա նման գործողություններով ոչնչի չեն հասնի. «Ես կարծում եմ՝ իրենք ուղղակի ցանկանում են ուշադրության արժանանալ: Շատ վատ եմ վերաբերվում նման քայլերին, քանի որ մեզ համար պետք է որոշակի չգրված կանոններ էլ գործեն, մենք նախագահին ոչ միայն որպես երկրի նախագահի պիտի վերաբերվենք, այլ նաև որպես խորհրդանիշի: Չի կարելի նմանատիպ վերաբերմունք դրսևորել մեր ամենակարևոր քաղաքական գործիչների հանդեպ»,- համոզված է Աճեմյանը:

Լիլիթ Շաբոյան