Թիրախում առաջին հերթին արժեքներն են․ պետության պարտավորությունն է պաշտպանել իրավապաշտպան հանրույթներին․ Զարուհի Հովհաննիսյան. ՏԵՍԱՆՅՈՒԹ

Թիրախում առաջին հերթին արժեքներն են: «Ի՞նչ նպատակով են թիրախավորվում իրավապաշտպանները պատերազմի ժամանակ» թեմայով քննարկման ժամանակ այս մասին ասաց իրավապաշտպան Զարուհի Հովհաննիսյանը՝ անդրադառնալով դիտարկմանը, որ մեր թշնամին մեկն է և նա սահմանից այն կողմ է, սակայն թիրախավորումներ են տեղի ունենում նաև երկրի ներսում:

«Պատերազմը այն փոթորիկն է, որը սկսում է խարխլել արժեքները, մարդիկ սկսում են կասկածել, սոցցանցերում հուսահատված գրառումներ են արվում՝ կապված եվրոպական արժեքների, մարդու իրավունքների հետ, տարբեր  հանրային հուզումներ կան խնդիրների վերաբերյալ. պատերազմը, այո՛, լուրջ սթրես է: Խաղաղության իրավունքը մարդու հիմնարար իրավունքն է, և պատերազմը առաջին սպառնալիք է այդ իրավունքի դեմ»,- ասաց Հովհաննիսյանը:

Իրավապաշտպանի դիտարկմամբ՝ արժեքների վերաբերյալ կասկածներն ու թիրախավորումը արտահայտվում է տարբեր մակարդակում՝ անհատական, հանրույթների և լրատվամիջոցների մակարդակում:

«Լրատվամիջոցն ունի պարտավորություն և պատասխանատվություն հասարակության առջև, թե ինչ տեղեկատվություն կամ տեսակետ է հասցնում իր խողովակներով: Խոսքի ազատության շղարշի տակ լրատվամիջոցը ակնհայտ ատելության խոսք է հնչեցնում, թիրախավորում կոնկրետ արժեքներ և իրենց առջև խնդիրներ դրած իրավապաշտպաններին»,- նշեց Հովհաննիսյանը՝ ընդգծելով նաև, որ պետության պարտավորությունն է պաշտպանել իրավապաշտպան հանրույթներին, սակայն այդ պարտավորությունը չի կատարվում:

Մանրամասները՝ տեսանյութում: