Քաղաքականություն
22.10.2020 | 13:40
ԱՄՆ Կոնգրեսի գրադարանն իր գրառումներում պաշտոնապես կճանաչի Հայոց ցեղասպանությունը։ ԱՄՆ կոնգրեսականներ Ադամ Շիֆը, Ֆրենկ Փալոնեն, Գաս Բիլիրակիսը, Ջեքի Սփեյերը և Դինա Տիտուսը հայտարարել են, որ Կոնգրեսի գրադարանը կճանաչի Հայոց ցեղասպանությունը՝ գրառումներում «հայերի կոտորած» բառակապակցությունը փոխարինելով «Հայոց ցեղասպանությամբ», հայտնում են կոնգրեսական Ադամ Շիֆի գրասենյակից։
Կոնգրեսի գրադարանավար, դոկտոր Կառլա Հեյդենն իր հերթին հայտարարել է, որ գրադարան են ուղարկվել նամակներ երկու կուսակցություններից։ Տեղեկացվում է, որ այս փոփոխությունը կատարվում է այն բանից հետո, երբ Ներկայացուցիչների պալատի և Սենատի ճնշող մեծամասնությունը 2019թ. ընդունեց Հայոց ցեղասպանության փաստերը ճանաչող բանաձևը:
«Ողջունելի է այն լուրը, որ Գրադարանային համագումարը մեր հորդորով այժմ կօգտագործի «Հայոց ցեղասպանություն» պատմականորեն ճշգրիտ արտահայտությունը: Սա տասնամյակների ժխտողական արշավը հաղթահարելու ևս մեկ քայլ է, որը թույլ չի տվել շատերին խոսել 1․5 միլիոն հայերի սպանության մասին»,- հայտարարել է Ադամ Շիֆը։
Վերջինը նշել է, որ այս որոշումը հատկապես կարևոր է այս ժամանակաշրջանում, քանի որ Ադրբեջանն ու Թուրքիան Հայոց ցեղասպանությունից մեկ դար անց այժմ էլ վայրագություններ են անում Արցախում:
Տաթև Ֆռանգյան
