Զինյալները կենդանի չեն հեռանալու այստեղից․ եթե մերոնք էլ չսպանեն, ադրբեջանցիներն են սպանելու․ Գրիգորյան․ ՏԵՍԱՆՅՈՒԹ

Սեպտեմբերի 27-ին սկսված պատերազմի ընթացքում Ադրբեջանը Արցախի դեմ հարձակումների ժամանակ օգտագործում է ոչ միայն Թուրքիայի օգնությունը, այլև Թուրքիայի հավաքագրած զինյալներին։ Վարձկանների ներգրավվածության մասին Factor TV-ն զրուցել է արաբագետ Սարգիս Գրիգորյանի հետ։

– Պարո՛ն Գրիգորյան, տեսանյութերում վարձկանները բողոքում են իրենց պայմաններից։ Երբ նրանք Սիրիայից տեղափոխվում են մեր տարածաշրջան, կռվում են Արցախում, ի՞նչ խնդիրների են բախվում։

– Այս զինյալներին 1․500 դոլար են խոստացել, որպեսզի նրանք Արցախում կռվեն մեր ուժերի դեմ։ Ըստ մեզ հանդիպող տեղեկությունների՝ նրանք բողոքում են, որ նախ՝ գումարը նրանց ամբողջությամբ չեն տվել, ընդհանրապես չեն տվել կամ սիմվոլիկ գումար են տվել՝ խոստանալով, որ հետագայում՝ «հաղթանակի» դեպքում ամբողջը կտան։

Բողոքում են պայմաններից, բողոքում են նրանից, որ չեն թողնում նկարահանումներ անել։ Խոստացել են, որ կտան սահմանապահ զորքերի հանդերձանք, և որ նրանք թեժ մարտերի չեն մասնակցի, այլ կիրականացնեն սահմանային օբյեկտների անվտանգության, պաշտպանության ծառայություն։ Բայց նրանց միանգամից տարել են առաջնագիծ։ Բողոքում են, որ սպառազինությունն էլ այնպիսին է, որ չեն կարողանում կռվել։ Պայմաններ, սնունդ, մի խոսքով՝ շատ բաներից են բողոքում։

– Ի՞նչն է դրդում Ադրբեջանին՝ օգտվել այս վարձկանների ծառայությունից։

– Ում որ բերել են, սրանք ունեն ռազմական գործողությունների փորձ, անցել են մի քանի պատերազմ՝ Սիրիա, Լիբիա։ Եվ այս ռազմական գործողությունների փորձը նախ Թուրքիային, ապա և Ադրբեջանին ստիպում է սրանց մեջ տեսնել զինյալներ, որոնք կարող են ուղղակի կռիվ տալ մեր զորքերի դեմ, այսինքն՝ ունակ են ռազմի դաշտում գործելու։ Երկրորդ՝ այս զինյալներին օգտագործելով՝ Ադրբեջանը խուսափում է իր զինվորների շարքերում զոհերի քանակից, սպանվածների քանակից։ Այսինքն՝ այնքան մեծ քանակի սպանվածներ չի տալիս, որքան պետք է տար։

Կան տեղեկություններ, որ նրանք, ամեն դեպքում, ողջ դուրս չեն գա այստեղից։ Կա՛մ մերոնք կսպանեն, կա՛մ եթե թողնեն ամեն ինչ, հետ գնան, ադրբեջանցիները կսպանեն։ Այսինքն՝ մեծ հաշվով գումարն էլ, որ խոստացել են, չեն տալու։

– Աշխարհում հասկանում են, որ վարձկանների օգտագործումն արդեն իսկ վատ է, դա դժկամությամբ է ընդունվում աշխարհում։ Հայաստանը, օգտագործելով այս իրավիճակը, ի՞նչ շահեր կարող է առաջ մղել, ինչի՞ կարող է հասնել։

– Շատ լուրջ, մեծ աշխատանք է պետք տանել՝ ի ցույց դնելու իրական Թուրքիայի և Ադրբեջանի պատկերը, որ այս երկրները 21-րդ դարում ֆինանսավորում են, աջակցում են վարձկաններին և ահաբեկչական կազմակերպություններին՝ իրենց նպատակներին հասնելու համար։

Եվ մեր գործընկերներին՝ թե՛ տարածաշրջանում, թե՛ տարածաշրջանից դուրս, իրոք պետք է ներկայացնենք իրական պատկերը և փորձենք հասնել նրան, որ լինեն ոչ միայն հայտարարությունների տեսքով մեզ աջակցության կոչեր, այլ նաև լինեն գործնական քայլեր՝ զսպելու թուրք-ադրբեջանական տանդեմի ծավալապաշտական և հավակնոտ ծրագրերը տարածաշրջանում։

Հարցազրույցն ամբողջությամբ՝ տեսանյութում։

Գարիկ Հարությունյան