Անընդունելի է․ Կրեմլը՝ ռուս-ուկրաինական պատերազմի սառեցման Էրդողանի ծրագրի մասին

Ռուսաստանի համար անընդունելի է Ուկրաինայի հակամարտության «սառեցումը» առաջնագծի երկայնքով։ Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։ ՏԱՍՍ-ի փոխանցմամբ՝ նա այսպես է մեկնաբանել տեղեկություններն այն մասին, որ Թուրքիայի նախագահ Ռեջեփ Թայիփ Էրդողանը Ռիո դե Ժանեյրոյում կայանալիք G20-ի գագաթնաժողովում առաջարկելու է սառեցնել Ուկրաինայի հակամարտությունը ներկայիս ճակատային գծի երկայնքով:

«Ռազմական շփման գծի երկայնքով  «սառեցման» ինչ-որ տարբերակ, իհարկե, անընդունելի է ռուսական կողմի համար։ Տվյալ դեպքում նախագահ Պուտինի կողմից ձևակերպված հունիսյան պայմանները լիովին պահպանում են իրենց արդիականությունը։ Դա այն է, ինչ պետք է անել, որպեսզի ռազմական գործողություննրը դադարեցվեն»,- ասել է Պեսկովը։

Հունիսին ՌԴ նախագահ Վլադիմիր Պուտինը նշել էր չորս պայման Կիևի հետ բանակցությունների համար, այդ թվում՝ Ուկրաինայի զինված ուժերի դուրսբերումը Դոնբասից և Նովոռոսիայից, Կիևի՝ ՆԱՏՕ-ին միանալուց հրաժարվելը։ Ըստ Պուտինի՝ Ռուսաստանն անհրաժեշտ է համարում Ուկրաինայի համար չեզոք  կարգավիճակը և Արևմուտքի բոլոր պատժամիջոցների վերացումը։

Հիշեցնենք՝ Bloomberg-ը հայտնել էր, որ Թուրքիայի նախագահ Ռեջեփ Թայիփ Էրդողանը պատրաստվում է նոյեմբերի 18-ին Ռիո դե Ժանեյրոյում G20-ի ղեկավարների հանդիպմանը ներկայացնել ռուս-ուկրաինական պատերազմը ներկա պայմաններում սառեցնելու իր առաջարկը:

Թարգմանությունը՝ Էմմա Չոբանյանի