19.09.2026 | 16:22
Երևանում կանցկացվի բժշկական զբոսաշրջության գլոբալ համաժողով
Թուրքիայի քայլերն Էրդողանի համար լավ ավարտ չեն ունենա․ Արաբական երկրների լիգայի ղեկավար
Քաղաքականություն
05.10.2020 | 14:23
Կովկասում ու Միջերկրական ծովի երկրներում լարվածության բարձրացման համար Արաբական երկրների լիգայի ղեկավարը նախազգուշացրել է Թուրքիային՝ հայտարարելով, որ «դա լավ չի վերջանա» նրա համար, գրում է arabnews.com-ը։
Արաբական երկրների լիգայի գլխավոր քարտուղար Ահմեդ Աբուլ Գեյթն իր տեսաուղերձում ասել է․ «Թուրքիան այնպիսի տարաձայնությունների հետ է բախվում տարածաշրջաններում, որոնք կարող են լավ ավարտ չունենալ իր կամ այդ երկրի ղեկավարության համար»։
«Թուրքիայի նախագահ Ռեջեփ Թայիփ Էրդողանը միջամտում է Եգիպտոսում, Սիրիայում, Իրաքում ու Լիբիայում հակամարտություններին։ Էրդողանը միջամտում է նաև Կովկասում Ադրբեջանի ու Հայաստանի միջև բախումներին, հակամարտության մեջ է Հունաստանի ու Կիպրոսի հետ, հարձակվում է Միջերկրական ծովի արևելյան երկրների՝ գազով հարուստ տարածքների վրա, ինչից դրդված էլ այնպիսի հզոր ու ազդեցիկ երկիր, ինչպիսին Ֆրանսիան է, զորք է ուղարկում Կիպրոս։ Անգամ Իտալիան, որը բազում հարցերում կողմ էր Թուրքիայի դիրքորոշմանը, աջակցեց Ֆրանսիային։ Բոլորն Էրդողանին ասում են, որ պատասխանատվության կենթարկվի իր այս քայլերի համար»,- հայտարարել է նա։
Ահմեդ Աբուլ Գեյթը նաև մտահոգություն է հայտնել, որ սիրիացի զինյալները կռվում են Ադրբեջանի հետ ընդդեմ Հայաստանի․ «Չափազանց մտահոգիչ է, որ սիրիացի վարձակններն օգտագործվում են Էրդողանի կողմից նաև այն դեպքերում, որոնք կապված չեն Թուրքիայի հետ»։
