Ղարաբաղում խաղաղարարների տեղակայման հարցով նախաձեռնությունը պետք է Երևանից կամ Բաքվից լինի․ Կոսաչով

Այս փուլում միայն Հայաստանը կամ Ադրբեջանը կարող են հանդես գալ Լեռնային Ղարաբաղում խաղաղապահ ուժերի տեղակայման, ինչպես նաև ԵԱՀԿ Մինսկի խմբի գծով բանակցությունների մասին նախաձեռնությամբ։ ՏԱՍՍ-ի փոխանցմամբ՝ նման կարծիք է հայտնել ՌԴ Դաշնային խորհրդի միջազգային հարաբերությունների հանձնաժողովի ղեկավար Կոնստանտին Կոսաչովը։

«Ինչ վերաբերում է ավելի լայն իմաստով խաղաղարարությանը, օրինակ՝ ՄԱԿ-ի կապույտ սաղավարտներ կամ ԵԱՀԿ-ի գծով ինչ-որ ուժեր, ապա դա կոլեկտիվ մակարդակով դիտարկման առարկա է, այստեղ հարկավոր է քննարկումներ անցկացնել ԵԱՀԿ Մինսկի խմբի գծով, որը ՄԱԿ-ի համապատասխան մանդատն ունի»,- լրագրողների հետ զրույցում ասել է նա։

Կոսաչովը հավելել է, որ, համենայն դեպս, այս փուլում նման նախաձեռնություն չպետք է լինի որևէ մեկի կողմից՝ բացի Հայաստանից կամ Ադրբեջանից, եթե խոսքն ավելի լայն համատեքստում խաղաղարարների մասին է։

Նա հիշեցրել է, որ ՀԱՊԿ կանոնադրության համաձայն՝ կազմակերպության գծով ցանկացած գործընթաց սկսելու համար անհրաժեշտ է համապատասխան երկրի դիմումը, «եթե այն իրեն ագրեսիայի օբյեկտ է համարում»։

«Մինչև այն պահը, քանի դեռ հայկական կողմը նախաձեռնություն հանդես չի բերում, Լեռնային Ղարաբաղ խաղաղարարների տեղակայման թեմայով ցանկացած քննարկում, կարծում եմ, բացարձակ ավելորդ է։ Եթե նման դիմում լինի, եթե հայկական կողմը հիմնավորումներ ներկայացնի, որոնք կհաստատեն նման խնդրանքը, այդ դեպքում դարձյալ այն կդառնա ՀԱՊԿ-ում կոլեկտիվ քննարկումների առարկա, դա չպետք է ռուսական կողմի կամ ՀԱՊԿ անդամ որևէ պետության միանձնյա որոշում»,- հավելել է Կոնստանտին Կոսաչովը։