Քաղաքականություն
29.09.2020 | 16:25
Կրեմլում վստահ են, որ Լեռնային Ղարաբաղի համար պատերազմող Հայաստանին և Ադրբեջանին հնարավոր ռազմական օգնության մասին հայտարարությունները միայն «յուղ են լցնում կրակի վրա»։ Լրագրողների հետ զրույցում այս մասին ասել է ՌԴ նախագահի խոսնակ Դմիտրի Պեսկովը՝ հավելելով, որ հարկավոր է կողմերին համոզել՝ վերադառնալ հակամարտության քաղաքական-դիվանագիտական ճանապարհով կարգավորմանը, գրում է ՏԱՍՍ-ը։
«Կրեմլում առաջին հերթին ելնում են կրակը և ռազմական գործողություններն անհապաղ դադարեցնելու անհրաժեշտությունից։ Որևէ ռազմական աջակցության կամ ռազմական ակտիվության մասին ցանկացած հայտարարություն միանշանակ կրակի վրա յուղ է լցնում։ Մենք կտրականապես դեմ ենք դրան»,- ընդգծել է Կրեմլի խոսնակը։
«Մենք կոչ ենք անում բոլոր երկրներին, հատկապես՝ մեր գործընկերներին, ինչպիսին է Թուրքիան, անել ամեն ինչ՝ հակամարտող կողմերին համոզելու համար դադարեցնել կրակը և վերադառնալ այս հնացած հակամարտությունը քաղաքական-դիվանագիտական միջոցներով խաղաղ կարգավորելուն»,- նշել է Պեսկովը։
Նա նաև ընդգծել է, որ «ռուսական կողմը տարբեր մակարդակներով մշտական կապի մեջ է Երևանի, Բաքվի և Անկարայի հետ»։
«Մենք հավաքում ենք շփման գծում տեղի ունեցող իրադարձությունների հետ կապված ամբողջ տեղեկությունը, հետևում ենք բոլոր լուրերին, վերլուծում ենք իրավիճակը և օգտագործում ենք այդ գիտելիքը՝ մեր դիրքորոշման ձևավորման և հետագա քայլերի որոշման համար՝ Մինսկի խմբի մեր մյուս գործընկերների հետ»,- ասել է Պեսկովը։
Նա հայտարարել է, որ Ռուսաստանն ու ԵԱՀԿ Մինսկի խմբի համանախագահ մյուս երկրները պետք է առանց արկածախնդրության պատասխանատու դիրք զբաղեցնեն Լեռնային Ղարաբաղի կարգավորման հարցում։
Կրեմլի խոսնակը նաև նշել է, որ շփման գծում ծավալվող իրադարձությունները ՀԱՊԿ-ում խորը վերլուծության թեմա են։
«Ներկա իրավիճակը, շփման գծում ռազմական գործողություները ՀԱՊԿ-ում խորը վերլուծության թեմա են։ Մնացյալում ես զերծ կմնամ որևէ մեկնաբանությունից՝ բացառապես ելնելով այն հանգամանքից, որ դա չափազանց զգայուն նյութ է, որտեղ բոլորը պետք է բացարձակ զգուշություն ցուցաբերեն»,- ասել է Դմիտրի Պեսկովը։
