Արդյոք իրակա՞ն են ալկոգելերում թունավոր սպիրտի առկայության վերաբերյալ լուրերը. ՏԵՍԱՆՅՈՒԹ

Արմավիրի մարզում ու Երևանում ալկոհոլային թունավորման մահացու դեպքերից հետո մամուլում տեղեկություն հայտնվեց, թե նույն թունավոր սպիրտի հիմքով ալկոգելեր են արտադրվել և շուկայում վաճառքի են դրված։

Հիշեցնենք, որ մեթիլի մահացու դոզա պարունակող սպիրտի թունավորումից Հայաստանում մահացել է 21 մարդ, նրանցից 10-ը Արմավիրի, 1-ը՝ Կոտայքի մարզում, 10-ը՝ Երևանում։ Թե արդյոք այս երեք դեպքերը փոխկապակցված են, այս պահին հայտնի չէ, ինչպես և հայտնի չէ, թե որն է եղել թունավոր սպիրտի ծագման աղբյուրը` այն տեղական արտադրությա՞ն է եղել, թե՝ ներկրվել է։

Պատկան մարմինները լռում են, իսկ Քննչական կոմիտեն էլ քչախոս է։

Քննչական կոմիտեից հայտնում են, որ Արմավիրում զանգվածային թունավորման դեպքի առթիվ հարուցված քրեական գործի նախաքննության ընթացքում պարզվել է, որ ալկոհոլային թունավորման արդյունքում տուժել է 27 անձ, որոնցից 10-ը մահացել է: Քրեական գործով նշված 27 անձինք ճանաչվել են տուժող: Երեք անձի մեղադրանք է առաջադրվել և խափանման միջոց ընտրվել կալանավորումը։

Ինչևէ անդրադառնալով ալկոգելերին նշենք, որ ըստ Yerevan.today կայքի հրապարակման՝ ենթադրյալ թունավոր ալկոգելի անվանումը` «Bariton» է։

Factor.am-ի հետ զրույցում Շուկայի վերահսկողության տեսչական մարմնի ղեկավարը, սակայն, չցանկացավ ալկոգել արտադրող ընկերության անվանումը նշել, փոխարենն ասաց, իրենք հնարավոր թունավոր ալկոգելերի տարբեր խմբաքանակներ վաճառքից հանել են, հանձնել փորձաքննության, արդյունքնենը արդեն իսկ հայտնի են։

Կասկածելի ալկոգելերի արտադրողը թունավոր սպիրտի վաճառքի համար ձերբակալված անձանցից մեկի ընտանիքին է պատկանել, բայց փորձաքննության արդյունքների համաձայն՝ հիմքում թունավոր նյութեր չեն հայտնաբերվել։

Սննդագիտության դոկտոր Դավիթ Պիպոյանը թերի է գնահատում պետության վարած քաղաքականությունը սննդային անվտանգության առումով։ Նա նշում է, որ 21 մարդու մահը ո՛չ պատշաճ արձագանքի արժանացավ, ո՛չ էլ հասարակությունը իրականությունն իմացավ։

Պիպոյանը մտավախություն ունի, որ այս գործով հասարակությանը այդպես էլ ամբողջական ինֆորմացիա չի տրամադրվում, քանի որ պատկան մարմինները փորձում են «խոշոր խաղացողի» ջրից չոր դուրս հանել։ Փորձագետը նաև ոչ բավարար է գնահատում հասարակության հետ տարված աշխատանքը, նշելով, որ ի սկզբանե պետք էր բոլորին հստակ ասել վտանգավոր սպիրտի ծագման և տարածման կետերը, որպեսզի հետագա նոր դեպքերից խուսափենք։

Factor.am-ը փորձեց Քննչական կոմիտեից տեղեկանալ, թե արդյոք պարզվել է թունավոր օղին ներկրվել էր, թե տեղական արտադրության էր և արդյոք գրանցված բոլոր դեպքերը փոխկապակցված են։ Սակայն Քննչական կոմիտեից միայն նշեցին, որ նախաքննությունը շարունակվում է։

Մանրամասները՝ տեսանյութում։

Լիլիթ Շաբոյան