19.04.2026 | 23:45
Գետերում նկատվում է ջրի մակարդակի բարձրացում. ՆԳՆ ՓԾ-ն անցել է ուժեղացված ծառայության
ՌԴ դեսպանը՝ ՀԿԵ-ի շուրջ տիրող իրավիճակի մասին
Քաղաքականություն
18.09.2020 | 21:03
Շատ ուրախ եմ, որ բոլոր հարցերը հանվել են և ամեն ինչ պարզաբանվել է: Այս մասին այսօր լրագրողների հետ զրույցում ասել է Հայաստանում ՌԴ արտակարգ և լիազոր դեսպան Սերգեյ Կոպիրկինը՝ անդրադառնալով Հարավկովկասյան երկաթուղու (ՀԿԵ) շուրջ ստեղծված իրավիճակին:
«Կողմերը եկել են այն եզրակացության, որ իրավիճակը նորմալ է: ՀԿԵ-ն աշխատում է: Շատ կարևոր է, որ երկու կողմերն էլ հավատարիմ են այստեղ ՀԿԵ գործունեության զարգացմանը, ներդրումները շարունակվել են, որպեսզի այս աշխատանքն արդյունավետ դառնա»,- հավելել է դեսպանը:
Հիշեցնենք, որ արդեն երկու տարի է՝ Հայաստանի իրավապահ մարմինները հետաքննում են ընկերության գործունեությունը: Ռուսական կողմը հայտարարեց համաձայնագիրը վաղաժամկետ խզելու հնարավորության մասին, սակայն այս տարվա սեպտեմբերի 2-ին Ռուսաստանի տրանսպորտի փոխնախարար Վլադիմիր Տոկարևը և Հայաստանի տարածքային կառավարման եւ ենթակառուցվածքների փոխնախարար Արմեն Սիմոնյանը առկա տարաձայնությունները լուծող արձանագրություն ստորագրեցին:
Ինչ վերաբերում է Հայաստանի և Ռուսաստանի միջև կանոնավոր ավիահաղորդակցության վերականգնմանը, ՌԴ դեսպանի հավաստմամբ՝ հարցը քննարկվում է երկու երկրների միջև, ինչպես նաև ԵՏՄ շրջանակում: Սերգեյ Կոպիրկինի խոսքով՝ կանոնավոր չվերթների վերականգնումը կախված է համաճարակային իրավիճակից:
Դեսպանը նշել է նաև, որ արտակարգ դրության պայմաններում կառավարության կայացրած որոշումների արդյունքում մեծ թվով հայեր են մեկնել Ռուսաստան:
«Կան որոշակի պահանջներ, որոնք ներկայացվում են Հայաստանի քաղաքացիներին՝ երկրից դուրս գալու համար: Կարծում եմ՝ բավարար կերպով հաշվի են առնվում մարդասիրական և այլ իրավիճակները, որոնք կարող են հնարավոր դարձնել Հայաստանի քաղաքացիների մուտքը Ռուսաստան»,- ընդգծել է Կոպիրկինը:
