Իսրայելում կորոնավիրուսի պատճառով երկրորդ լոքդաունն է սկսել գործել

Իսրայելի կառավարությունը նոր կորոնավիրուսով վարակի դեպքերի կտրուկ աճի ֆոնին կրկին համազգային լոքդաուն է սահմանել։ Սեպտեմբերի 18-ից կրկին փակվել են դպրոցները, մանկապարտեզները, հյուրանոցները, առևտրի կենտրոնները, հանգստի գոտիներն ու լողափերը։ Ռեստորաններն իրավունք ունեն միայն առաքել, գրում է DW-ի ռուսական ծառայությունը։

Երկրի բնակիչներն իրավունք ունեն տանից 500 մետրից ավելի հեռանալ միայն բացառիկ դեպքերում։ Սահմանափակող միջոցառումները կգործեն առնվազն երեք շաբաթ։

Առայժմ հայտնի չէ, թե որքանով է բնակչությունը պատրաստ հետևել նոր կանոններին։ Նշվում է, որ նոր լոքդաունի շրջանում մի շարք կարևոր հրեական տոներ կան, բացի այդ՝ վերջին շաբաթներին Իսրայելում ամեն օր բողոքի ակցիաներ էին կազմակերպվում՝ կորոնավիրուսի դեմ պայքարի ոլորտում կառավարության քաղաքականության դեմ։

Սահմանափակումներին հետևելու նկատմամբ վերահսկողություն սահմանելու գործում ոստիկանությանն օգնելու համար հազար զինվորական կներգրավվի։

Իսրայելի նախագահ Ռեուվեն Ռիվլինը միասնականոււթյան և ջանքերը համատեղելու կոչ է արել։

«Մենք պետք է ամեն ինչ անենք, որպեսզի վերականգնենք մեր քաղաքացիների անձնական, բժշկական և տնտեսական վստահությունը։ Սա երկրորդ հնարավորություն է, և մենք պետք է օգտագործենք այն, քանի որ վախենում եմ, որ երրորդը չենք ունենա»,- հավելել է նա։

Հավելենք, որ ընդդիմությունը սուր քննադատության է ենթարկել նոր լոքդաուն սահմանելու՝ կառավարության որոշումը՝ այն սխալ և աղետալի որակելով։

Ընդդիմության առաջնորդ Յաիր Լապիդը հայտարարել է, որ քաղաքացիներին պատժում են իշխանությունների ձախողման համար։ Նա նշել է, որ կորոնավիրուսի պատճառով ստեղծված ճգնաժամն առանց այն էլ մեծ վնաս է հասցրել երկրի տնտեսությանը։

Սեպտեմբերի 15-ին Իսրայելում կորոնավիրուսի վարակի ռեկորդային աճ է արձանագրվել՝ 5.523 նոր դեպք։ Սա զգալիորեն բարձր է, օրինակ, Գերմանիայի ցուցանիշից, որի բնակչությունն 9 անգամ գերազանցում է Իսրայելի բնակչության թվին։