Ունեցածը զարգացնելու փոխարեն՝ ստեղծում ենք նոր բան, որն ինքներս էլ լավ չենք պատկերացնում․ փորձագետ. ՏԵՍԱՆՅՈՒԹ

«Հայկական աշխարհազոր. պաշտպանություն, անվտանգություն և մարդու իրավունքներ» թեմայով կազմակերպված քննարկման ժամանակ «Խաղաղության երկխոսություն» ՀԿ տնօրեն Էդգար Խաչատրյանը, անդրադառնալով աշխարհազորի ստեղծման վերաբերյալ օրենքի նախագծերի փաթեթին, ի թիվս մի շարք դիտարկումների՝ նշեց, որ խնդիրներ են առաջանալու՝ կապված մարդու իրավունքների հետ:

«Մենք խոսում ենք քաղպաշտպանության մասին, չնայած որ օրենքի նախագծերը դրա մասին չեն, քաղպաշտպանության դերի մասին այդ նախագծերում գրված չէ: Մյուս կողմից՝ պետք է ջանքեր գործադրենք, որ ՆԶՊ-ի դասերին միայն զենք քանդել- հավաքել չսովորեցնեն: Սովորեցրե՛ք, մի մեծ համակարգ կա: Այսինքն՝ ստեղծել մի նոր բան, այն դեպքում, երբ եղածը չենք կարողացել զարգացնել՝ կարևոր խնդիրներ լուծելու համար: Կամ խոսում ենք սահմանի բնակիչներին հնարավոր պատերազմական գործողություններին նախապատրաստելու մասին, խնդիրը հասկանալի է, բայց արդյո՞ք այս ուղղությամբ պետության կողմից գործողություններ իրականացվել են, դասընթացներ և աշխատանք տարվո՞ւմ է, թե ինչ անել հարձակումների դեպքում… Փոխանակ ռեսուրսներ, ջանքեր գործադրենք այդ աշխատանքն անելու համար, ստեղծում ենք նոր բան, որն ինքներս էլ լավ չենք պատկերացնում, թե ինչ տեսք է ունենալու, ինչպես է գործելու»,- ասաց փոևձագետը:

Էդգար Խաչատրյանը նաև ընդգծեց, որ մարդու իրավունքների հետ կապված հարցեր կան, որոնց պատասխանները նախագծում չկան. «Հստակ չէ, թե երբ առաջադրանք կատարելու ժամանակ մարդու առողջությանը վնաս հասցվի, ով է դրա համար պատասխանատու՝ Պաշտպանության նախարարությո՞ւնը, թե՞ ոչ, ինչպե՞ս են կարգավորվելու Ոազմական ոստիկանության, իրավապահ մարմինների և կամավոր առաջադրանք կատարող քաղաքացու իրավահարաբերությունները, որպես կամավոր գրանցվելիս մարդը բժշկական ստուգում անցնելո՞ւ է, թե՞ ոչ»:

Մանրամասները՝ տեսանյութում: