21.02.2026 | 20:00
Ինչպես է Հայաստանն առաջին անգամ ստացել UWW-ի մրցաշար անցկացնելու հնարավորություն․ զրույց Վլադիմիր Հովհաննիսյանի հետ
Կառավարությունը տարին փակում է ունեցած-չունեցածի վաճառքով
Տնտեսություն
07.12.2017 | 20:54
Կառավարությունը վաճառքի է հանել պետգույքի հերթական խմբաքանակը՝ 4 միավոր գույք:
Դրանցից մեկը «Վարդենիսի ստոմատոլոգիական պոլիկլինիկան» է, որը գնահատվել է 361 հազար դրամ: Հաջորդ գույքը «Երառսպասարկում» ՓԲԸ-ն է, որի աճուրդի մեկնարկային գինը 17.5 մլն դրամ է: «Երառսպասարկում» ՓԲԸ-ն հանդիսացել է պարենային և ոչ պարենային ապրանքների մեծածախ, մանրածախ առևտրի, հանրային սննդի ծառայությունների կազմակերպման գլխամասային ձեռնարկություն՝ 10 հազար «փոքր օբյեկտերով», որոնք վաղուց մասնավորեցվել են: Վերոնշյալ երկու գույքն էլ ներառված են պետգույքի մասնավորեցման 2017-20թթ. ցանկում:
Հաջորդը «Նորք հոգեբուժական կենտրոն» ՓԲԸ-ի մի մասն է: Այն 868 329 840 դրամով վաճառվում է «Հին Նորք» բիզնես կենտրոն» ՓԲԸ-ին՝ բազմաֆունկցիոնալ բիզնես կենտրոն կառուցելու համար:
Վաճառքի հանված վերջին պետգույքը դարձյալ բարձր արժեք ունի՝ 300 մլն դրամ: Խոսքը Երևանի Մելիքյան փողոցում գտնվող 6319 քառ. մետր մակերեսով շենք շինությունների և հսկայական հողամասի մասին է, որոնց արժեքը գնահատված է 386 մլն դրամ և չի հիմնավորվում գնահատված արժեքից 86 մլնով էժան վաճառքը: Օտարվում է «Դամալա Գրուպ» ՍՊԸ-ին:
2018 թվականի պետական բյուջեն ավելացել է 15 մլրդ դրամով: Ֆինանսների նախարար Վարդան Արամյանը դեկտեմբերի 6-ին խորհրդարանում հայտարարեց, թե ավելացված ծախսերը փակելու են պետական գույքի մասնավորեցմամբ:
Այսինքն, կառավարությունը վաճառում է պետական ունեցվածքը՝ ևս մեկ տարի պետբյուջեն կատարելու համար: Ու հարց է, թե ինչ կլինի հետո, չէ՞ որ պետական գույքն անսահմանափակ չէ:
