Գիշերային ժամերին վարկերի տրամադրումն արգելելու նախագիծը հետաձգվեց. ի՞նչ ռիսկեր է տեսնում ԿԲ-ն. ՏԵՍԱՆՅՈՒԹ

ԱԺ ֆինանսավարկային և բյուջետային հարցերի հանձնաժողովի նիստում այսօր քննարկվեց նաև «Սպառողական կրեդիտավորման մասին» օրենքում լրացում կատարելու մասին օրենսդրական նախագիծը, որով առաջարկվում է գիշերային ժամերին արգելել սպառողական վարկերի տրամադրումը. պատգամավորները խաղամոլության կամ գողոնի իրացման ռիսկեր են տեսնում:

ՀՀ ԿԲ նախագահի տեղակալ Ներսես Երիցյանը, ներկայացնելով իր դիտարկումները, նշեց, որ խնդիրը միայն օրենսդրական այս կարգավորումով հնարավոր չէ լուծել․ «Այս ձևով չենք կարող լուծել հարցը և վերացնել այն մտահոգությունը, որ գոյություն ունի: Եթե ցանկացած պահի սրտնեղենք, օրենք գրենք, դա կարող է շատ ավելի մեծ ինստիտուցիոնալ խնդիրներ առաջացնել: Խնդիրը վարքագծային է, և վարքագծային տնտեսագիտության տեսակետից պետք է խորը ուսումնասիրության ենթարկել երևույթը, քանի որ այս օրենսդրական կարգավորումով կարող ենք հակառակ վարքագծային հոգեբանական խնդիրներ առաջացնել»:

ԿԲ նախագահի տեղակալի խոսքով՝ ինչ վերաբերում է օնլայն տրամադրվող վարկերին, որը հաճախորդը կարող է ստանալ՝ իր քարտին փոխանցում կատարելով, վերահսկելի չէ, թե նա որ ժամին կարող է ստանալ. «Պետք է գնանք սահմանափակումների, իսկ դա տեխնիկական առումով շատ թանկ կլինի»:

«Մեր եզրակացությունը հետևյալն է՝ այս նախագծով հնարավոր չէ խնդիրը լուծել, վարկառուների հետ կապված լուրջ խնդիրներ կառաջացնենք, և կապված կորոնավիրուսի համավարակով պայմանավորված ստեղծված իրավիճակում առաջացած ռիսկերի հետ՝ բանկերի և ֆինանսական կազմակերպությունների համար բարդություններ կստեղծենք և խնդիրներ կառաջացնենք, որը կզսպի վարկավորումը, ինչը շատ կարևոր է մեր քաղաքացիների սոցիալական խնդիրները լուծելու համար»,- ընդգծեց Ներսես Երիցյանը:

Գիշերային ժամերին վարկերի տրամադրումն արգելելու մասին նախագիծը հետաձգվեց:

Մանրամասները՝ տեսանյութում: