Նախօրեին «կորած» բելառուս ընդդիմադիրները հատել են երկրի սահմանը․ Կոլեսնիկովան ձերբակալվել է

Բելառուսի Ընդդիմության համակարգող խորհրդի անդամներ Անտոն Ռոդնենկովը, Իվան Կրավցովը և Մարիա Կոլեսնիկովան «հատել են սահմանային անցակետը և անցել Ուկրաինայի կողմ»։ Այս մասին ասել է Բելառուսի Պետական սահմանային կոմիտեի պաշտոնական ներկայացուցիչ Անտոն Բիչկովսկին, գրում է DW-ի ռուսական ծառայությունը։

Նա մատնանշել է, որ ընդդիմադիր գործիչները սահմանը հատել են «սեպտեմբերի 8-ի առավոտյան ժամը 5-ի սահմաններում», «Ալեքսանդրովկա» անցակետով։

Միաժամանակ, «Բելառուս 1» հեռուստաալիքի տվյալներով, Ռոդնենկովն ու Կրավցովն «այս գիշեր փախել են արտերկիր» և գտնվում են Ուկրաինայի տարածքում, իսկ Կոլեսնիկովան երկրից հեռանալու փորձի ժամանակ ձերբակալվել է։ Պետական սահմանային կոմիտեում հաստատել են տեղեկությունը։

Ուկրաինայի սահմանային ծառայությունում DW-ի հարցմանն ի պատասխան՝ հրաժարվել են տեղեկություն տրամադրել Համակարգող խորհրդի անդամների կողմից սահմանը հատելու մասին։ «Ձեր հարցումը վերաբերում է անձնական տվյալների և, Անձնական տվյալների պաշտպանության մասին օրենքին համապատասխան, չենք կարող նման տեղեկություն տրամադրել։ Համապատասխանաբար, մենք չենք կարող ո՛չ հաստատել, ո՛չ հերքել այն»,- ասել են սահմանային ծառայությունում։

Համակարգող խորհրդից, սակայն, նշել են, թե Կոլեսնիկովան, Ռոդնենկովն ու Կրավցովը չէին պատրաստվում հեռանալ Բելառուսից։

«Շատ տարօրինակ բաներ կան այս պատմության մեջ, որի մասին բարձրաձայնել է բելառուսական հեռուստաալիքը։ Նրանցից ոչ ոք մտադիր չէր հեռանալ երկրից։ Մենք սցենարներ էինք քննարկում, պայմանականորեն ասած՝ եթե առաջարկվի բանտ կամ արտերկիր, Մարիան հստակ ասաց, որ ոչ մի տեղ չի գնա»,- ասել է Համակարգող խորհրդի անդամ Մաքսիմ Զնակը։