04.04.2025 | 23:39
Հայաստանն ընտրվել է ՄԱԶԾ-ի, ՄԱԿ Բնակչության հիմնադրամի և ՄԱԿ Ծրագրերի իրականացման գրասենյակի գործադիր խորհրդի անդամ
Ադրբեջանում քովիդից 50 տոկոսով աճել է մահացածության ցուցանիշը․ իշխանությունները հրաժարվում են այն կապել կորոնավիրուսի հետ
Քաղաքականություն
19.08.2020 | 19:26
Ադրբեջանում կտրուկ, մոտ 50 տոկոսով մահացածության ցուցանիշն աճել է 2019թ-ի հետ համեմատած։ Չնայած, որ երկրում կորոնավիրուսով վարակվածների թիվը մեծ է, իշխանությունները չեն հայտարարում, որ մահերի աճը պայմանավորված է կորոնավիրուսի համավարակով։ Այս մասին գրում է JAMnews-ը։
Պաշտոնական տվյալներով՝ 2020թ-ի հունիսին Ադրբեջանում մահացել է 6203 մարդ։ Համեմատության համար 2019թ-ի հունիսին մահացել է 4055 մարդ։ 2014-2019թթ-ի հունիս ամսի մահացության միջին ցուցանիշը 4040 է։
«Այլ բառերով ասած, 2020-ի հունիսին Ադրբեջանում գրանցվել են 2163 «ավելորդ» մահվան դեպքեր։ Բայց պաշտոնական տվյալներով հունիսին կորոնավիրուսից մահացել է միայն 150 մարդ»,- ֆեյսբուքյան իր էջում գրել է JAMnews-ի տնտեսական փորձագետ Թողրուլ Մաշալին։
Ադրբեջանի պետական վիճակագրական կոմիտեն նաև հրապարակել է տվյալներ այն հիվանդությունների մասին, որոնցից երկրի բնակիչները ամենից հաճախ են մահանում։ Այդ տվյալների համաձայն՝ 2019թ-ին երկրում մահվան 55․ 916 դեպք է գրանցվել։ 58 տոկոսի մահվան պատճառը դարձել են սրտանոթային հիվանդությունները։ Երկրորդ տեղում ուռուցքային հիվանդություններն են՝ 15․8 տոկոս, երրորդ տեղում՝ 5 տոկոսով թունավորումները, վնասվածքները և այլ արտաքին գործոններով պայմանավորված մահերը։
Նշենք, որ ադրբեջանական ընդդիմադիր կայքերում ու սոցիալական ցանցերում պարբերաբար են տեղեկություններ հայտնվում այն մասին, երկրում կորոնավիրուսով վարակվածների թիվը շատ ավելի մեծ է, քան ներկայացնում են իշխանությունները։
Հատկապես խոսվում է երկրի ԶՈՒ-ում, քրեակատարողական հիմնարկներում վարակվածների ու մահերի մեծ թվի մասին, որոնք իշխանությունները թաքցնում են հանրությունից։ ԶՈւ-ում կորոնավիրուսից մահվան առաջին դեպքը իշխանությունները պաշտոնապես ներկայացրին միայն հուլիսի 31-ին, երբ մահացել էր ադրբեջանական ԶՈՒ-ի գլխավոր հոսպիտալի վերակենդանացման բաժանմունքի բժշկական ծառայության մայոր Թեյմուր Ջաֆարովը։ Նաև տեղեկություններ են տարածվում, որ ԶՈւ-ում կորոնավիրուսից մահացածներին հուղարկավորում են փակ ալյումինե դագաղներով՝ շատ դեպքերում տեղյակ չպահելով հարազատներին։ Ադրբեջանում կորոնավիրուսից մահացել են նաև մեծ թվով բժիշկներ, որոնց մասին ևս իշխանությունները չեն հայտնում։
Ընդհանուր առմամբ, պաշտոնական տվյալներով՝ Ադրբեջանում կորոնավիրուսով վարակվել է 34․744 մարդ, որից 32․201-ը բուժվել են, մահացել է 509 մարդ։
Էմմա Չոբանյան
