19.09.2026 | 16:22
Երևանում կանցկացվի բժշկական զբոսաշրջության գլոբալ համաժողով
Անկարգություններ Բեյրութում․ ցուցարարները նախարարությունների շենքեր են գրոհել
Քաղաքականություն
09.08.2020 | 12:05
Լիբանանի մայրաքաղաք Բեյրութում Կառավարության հրաժարականի պահանջով ցույցերն անկարգությունների են վերածվել։ Ցուցարարները գրոհել են երկրի ԱԳ նախարարության շենքը, մասին տեղեկացնում է BBC-ի ռուսական ծառայությունը։
Իրավապահներին հաջողվել է ազատել տարածքը, սակայն ցուցարարները կարողացել են գրավել կառավարական մի քանի այլ շենքեր։ Ավելի վաղ հավաքների մասնակիցները ներխուժել էին նաև Էկոնոմիկայի, Շրջակա միջավայրի նախարարությունների, ինչպես նաև Լիբանանի բանկերի ասոցիացիայի շենքերը։
Ակցիաներին 10-15 հազար քաղաքացի է մասնակցում։ Նրանք ճայթուկներ և քարեր են նետել իրավապահների ուղղությամբ, վերջիններն էլ արցունքաբեր գազ են կիրառել։
Չնայած իրավիճակն աստիճանաբար հանդարտվում է, այնուամենայնիվ, փողոցներում դեռևս հարյուրավոր ցուցարարներ են մնացել։ Երկրի խորհրդարանի շենքի մոտ բարիկադներ են կառուցվել՝ կանխելու ցուցարարների մուտքը։
Վերջին տվյալներով՝ բախումների հետևանքով 1 ոստիկան է զոհվել, մի քանի հարյուր մարդ է տուժել: Նրանց մի մասը տեղափոխվել է մոտակա հիվանդանոցներ:
Երկրի վարչապետ Հասան Դիաբը հայտարարել է, որ նախարարների խորհրդի հաջորդ նիստի ժամանակ կքննարկեն խորհրդարանական արտահերթ ընտրություններ անցկացնելու հարցը։
Նշենք, որ Բեյրութում ցույցերը վերսկսվել են օգոստոսի 4-ի պայթյունից հետո, որի հետևանքով մահացել է ավելի քան 150, վիրավորվել՝ 5 հազարը։
