Միլիոնատերերի գործող կառավարությունը երկրի պատմության մեջ ամենահարուստն է

Հայաստանի, Ռուսաստանի և Ամերիկայի նախագահները սվորաբար համեմատվում են անեկդոտներում: Բայց վերջերս համադրման մեկ այլ հարթակ գտանք: Պարզվում է, որ երեք երկրների այժմյան ղեկավարների ձևավորած կառավարություններն ու ղեկավարների մերձավոր շրջապատը այդ երկրների պատմության մեջ ամենահարուստն են:

Գանք հեռավոր օվկիանոսից. ԱՄՆ նախագահ Դոնալդ Թրամփը նախարարական կաբինետը ձևավորեց հիմնականում միլիարդատերերով: ԱՄՆ առևտրի նախարար Ուիլբուր Ռոսի կարողությունը 2016թ. գնահատվում էր 2,9 միլիարդ դոլար։ ԱՄՆ աշխատանքի նախարարն արագ սննդի ոլորտի խոշոր բիզնեսմեն Էնդի Փազդերն է, ում կարողությունը ևս գնահատվում է միլիարդով: ԱՄՆ-ում խոշորագույն ExxonMobil նավթային ընկերության ղեկավար Ռեքս Թիլլերսոնը երկրի պետքարտուղարն է: Կրթության նախարար Բեսթի Դևոսի կարողությունը 1,25 մլրդ է:

Համաձայն Forbes-ի՝ Թրամփի կառավարության անդամների ընդհանուր կարողությունն ամենամեծն է երկրի պատմության մեջ՝ 14 մլրդ դոլար: Այն 60 տոկոսով ավելի մեծ է, քան Բարաք Օբամայի կառավարության անդամների ընդհանուր կարողությունը: Անձամբ Թրամփի կարողությունը 3.7 մլրդ դոլար է, որը, սակայն, շարունակում է նվազել:  Կոռուպցիայի և կազմակերպված հանցագործության ուսումնասիրությունների միջազգային  կենտրոնը  (OCCRP) եւ  ռուսական «Նովայա գազետա» թերթը 2017թ. հոկտեմբերի 24-ին հետազոտություն հրապարակեցին ՌԴ նախագահ Վլադիմիր Պուտինի «մտերիմ շրջապատի»՝ ընտանիքի անդամների, հին ու նոր ընկերների ունեցվածքը գնահատելով 24 մլրդ դոլար:

ՌԴ նախագահի մտերիմ շրջապատին են դասել Արկադի և Բորիս Ռոտենբերգներին, Գենադի Տիմչենկոյին, Նիկոլայ և Յուրի Շամալովներին, Իգոր, Ռոման և Միխայիլ Պուտիններին, Վիկտոր Խմարինին, Յուրի Կովալչուկին և այլոց։ Ցուցակում չկան քաղաքական գործիչներ և պետական ընկերությունների թոփ մենեջերներ, որոնք Պուտինի ընկերներն են։ ՌԴ ներկայիս կառավարությունը ևս գնահատվել է այդ երկրի պատմության մեջ ամենահարուստը:

Սերժ Սարգսյանի նշանակած վերջին վարչապետի՝ Կարեն Կարապետյանի ղեկավարած կառավարությունը ևս Հայաստանի պատմության մեջ ամենահարուստն է: Առնվազն վարչապետը, առողջապահության, գյուղատնտեսության, էներգետիկայի և բնական պաշարների, տրանսպորտի, կապի և ՏՏ նախարարները և ՊԵԿ նախագահը հարուստ գործարարներ են:

Բարձրաստիճան պաշտոնատար անձանց էթիկայի հանձնաժողովի կայքում ուսումնասիրել ենք ՀՀ բոլոր 18 նախարարների ունեցվածքը: Միայն նրանց, վարչապետի և ՊԵԿ նախագահի, նրանց փոխկապակցված անձանց միջոցները համադրելով՝ Հայաստանի կառավարությունը դարձել է ամենահարուստը Հայաստանի պատմության մեջ: 20 հոգու պաշտոնապես հայտարարագրած ողջ գումարը՝ փոխառություններով, դրամական միջոցներով, բաժնետոմսերով, եկամտով, գերազանցում է 26.5 մլն դոլարը:

Համեմատության համար նշենք, որ Հովիկ Աբրահամյանի ղեկավարած կառավարությունը, օրինակ, հայտարարագրել էր 25 մլն դոլար: Սոցիալական, իրավական պետություն հռչակված Հայաստանում պետական պաշտոնյաները միլիոնատերեր են, իսկ երկրի բնակչության մեկ երրորդից ավելին՝ աղքատ է:

Որպես դժգոհների մխիթարություն՝ ընդունվեց ապօրինի հարստացման քրեականացման օրենքը, բայց ինչպես հայտնի ֆիլում էր ասվում՝ «վսյո ուկռադենո դո նաս»:

Սևակ Հակոբյան