Քոչարյանի պաշտպանները հրաժարվեցին նրա կալանքի տակ գտնվող գույքի արժեքը վկայող փաստաթղթեր ներկայացնել. ՏԵՍԱՆՅՈՒԹ

Երևանի ընդհանուր իրավասության դատարանի Շենգավիթի նստավայրում շարունակվում է ՀՀ երկրորդ նախագահ, Մարտի 1-ի գործով ամբաստանյալ Ռոբերտ Քոչարյանի և մյուսների գործով դատական նիստը։ Այսօրվա դատական նիստին շարունակվում է քննարկվել ամբաստանյալների գույքի վրա դրված կալանքը վերացնելու հարցը։

Դատարանը պաշտպաններից պահանջել էր ներկայացնել կալանքի տակ գտնվող գույքի արժեքը։ Ռոբերտ Քոչարյանի պաշտպաններից Հայկ Ալումյանը դատարանում ասաց, որ իրենք հրաժարվում են ներկայացնել գույքի արժեքը ներկայացնող փաստաթղթեր, քանի որ այդ պահանջի հասցեատերն իրենք չեն․ «Դատարանը պաշտպանական կողմի վրա է դրել կալանքի տակ դրված գույքի արժեքը հիմնավորելու պարտականությունը, նման պարտականություն պաշտպանական կողմը չի կրում»։

Ալումյանը, ներկայացնելով պաշտպանական կողմի դիրքորոշումը, նշեց, որ 07.06. 2019թ․ որոշմամբ՝ Երևանի ընդհանուր իրավասության դատարանը, դատավոր Աննա Դանիբեկյանի որոշմամբ, արձանագրել էր Ռոբերտ Քոչարյանի իրավունքների խախտումը, միաժամանակ, նույն որոշմամբ, դատարանը մերժել է Ռոբերտ Քոչարյանի իրավունքների խախտումը վերացնելու և քննիչին վարույթից հեռացնելու մասին պահանջները՝ պատճառաբանությամբ, որ մինչդատական վարույթի ավարտված լինելու պարագայում մինչդատական վարույթի նկատմամբ դատական վերահսկողության կարգով դիմողի իրավունքների պաշտպանությունը կարող է իրականացվել միայն նրա իրավունքների խախտումն արձանագրելով և առանց այն վերացնելու վարույթն իրականացնող մարմնի պարտականությունը սահմանելու։

Հայկ Ալումյանի փոխանցմամբ՝ դատարանը փաստել է, որ սույն դեպքով Ռոբերտ Քոչարյանի իրավունքների խախտումը վերացնելու պարտականություն սահմանելը հնարավոր չէ՝ անհասցե լինելու պատճառով, մինչդեռ, ներկա դրությամբ վարույթն իրականացնող մարմինը գործն ըստ էության քննող դատարանն է։ Ալումյանը տեղեկացրեց, որ սույն որոշման դեմ դատախազը վերաքննիչ բողոք է ներկայացրել, որում առկա հիմնավորումները կրկնվել են նախորդ դատական նիստին՝ դատախազների կողմից պաշտպանական կողմի միջնորդությունների վերաբերյալ առարկություններ ներկայացնելիս։

Ավելին՝ Ալումյանը նշեց, որ դատախազությունը հետ է կանգնել իր այն դիրքորոշումից, որն արտահայտել էր Վերաքննիչ դատարանում, մասնավորապես, որ գույքի վրա կալանք դրվել է միայն հնարավոր քաղաքացիական հայցը և դատական ծախսերն ապահովելու համար, այլ ոչ թե հնարավոր բռնագանձման կամ բռնագրավման, ուստի՝ որոշման այդ մասով անդրադարձ կատարելն առարկայազուրկ է։

Մանրամասները՝ տեսանյութում։