Հասարակություն
03.08.2020 | 17:30
Երևանի նախկին փոխքաղաքապետ Վահե Նիկոյանը և քաղաքապետարանի ենթակայության տակ գործող ընկերության նախկին տնօրեն Գևորգ Հակոբյանը չեն կալանավորվի. դատարանը մերժել է ՀՔԾ քննիչի միջնորդությունը։ Այս մասին Factor.am-ի հարցմանն ի պատասխան՝ հայտնեցին Հատուկ քննչական ծառայությունից։
ՀՔԾ-ից հավելեցին նաև, որ Նիկոյանին և Հակոբյանին մեղադրանք է առաջադրվել ՀՀ ՔՕ 308-րդ հոդվածի 2-րդ (պաշտոնեական լիազորությունները չարաշահելը) և 314-րդ հոդվածի 1-ին (պաշտոնեական կեղծիքը) մասերով։
«Մեղադրանքը չեմ ընդունում, նույնիսկ չեմ հասկանում, թե ինչ առնչություն կարող եմ ունենալ այդ մեղադրանքի հետ»,- Factor.am-ի հետ զրույցում ասաց Վահե Նիկոյանը՝ հորդորելով մնացյալ հարցերն ուղղել պաշտպաններին։
Փորձեցինք մեղադրանքի հետ կապված մանրամասներ ճշտել նրա պաշտպանից, սակայն վերջինիս հեռախոսն անջատված էր։
Նշենք, որ այս գործի շրջանակում մեղադրյալի կարգավիճակ ունի նաև ՀՖՖ նախկին նախագահ Ռուբեն Հայրապետյանը։ Նիկոյանը այս մասին խոսել չցանկացավ։ Ըստ ՀՔԾ-ի՝ Վահե Նիկոյանը մեղադրվում է աճուրդի հետ կապված կեղծ փաստաթղթեր շրջանառության մեջ դնելու համար։
Հավելենք՝ Ռուբեն Հայրապետյանը ՀՀ-ում չէ, նրա նկատմամբ հետախուզում էր հայտարարվել ՌԴ տարածքում, որը ռուսաստանցի իրավապահների կողմից հանվել է։
