Ադրբեջանական զինուժի 30 միլիոն դոլարանոց կորուստը. ինչ կարողություններ ունի խոցված ԱԹՍ-ն. ՏԵՍԱՆՅՈՒԹ

Հայաստանի Զինված ուժերն այսօր ադրբեջանական «Hermes-900» անօդաչու թռչող սարք է խոսել։ Պաշտպանության նախարարությունը հրապարակել է անօդաչուի խոցման տեսանյութը։

Ռազմական փորձագետները հայկական զինուժի մարտական այս գործողությունն աննախադեպ են համարում։ Աշխարհում առաջին անգամ է «Hermes 900» տեսակի անօդաչու թռչող սարք խոցվում:

«Hermes 900»-ը 30 մլն դոլար արժողությամբ մարտավարական խոշոր անօդաչու է։ Համացանցի բաց աղբյուրներից տեղեկանում ենք, որ այն արտադրում է իսրայելական Elbit systems ընկերությունը:

«Ռազմինֆո»-ի փոխանցմամբ՝ Ադրբեջանում դրանք տեղակայված են խորը թիկունքում և գտնվում են այդ երկրի պետական սահմանապահ ծառայության, այլ ոչ թե բանակի հաշվեկշռում։

Ըստ փորձագետների՝ այս անօդաչու սարքի կիրառումը վկայում է, որ սահմանին ընթացող գործողություններում, Ադրբեջանի բանակից բացի, ներգրավված է նաև պետական սահմանապահ ծառայությունը:

Ֆեյսբուքի հայկական տիրույթում հրապարակվել է նաև ադրբեջանական «Hermes-900»-ի՝ արբանյակից արված լուսանկարը։ Այն կայանված է Սանղաչալի ավիաբազայի թռիչքուղու վրա:

Միջազգային մամուլում հրապարակումներ կան այն մասին, որ 2016 թվականին Իսրայելն Ադրբեջանին 15 «Hermes 900» անօդաչու է մատակարարել։

«Hermes 900»-ը նախատեսված է վերահսկողության, ավիապարեկային ծառայության և հետախուզության համար։ Անհրաժեշտության դեպքում, անօդաչուն կարելի է համալրել հարվածային համալիրներով։ Սարքը թռիչքներ է իրականացնում մինչև 9․000 մետր բարձրության վրա և կարող է մինչև 350 կգ քաշով բեռ կրել։

Ի դեպ, «Hermes 900»-ից զատ՝ ՀՀ ԶՈՒ մարտական դիրքերից դիտարկվել է հակառակորդի տանկի շարժ, որը ևս խոսցվել է: Այսօր կեսօրին ադրբեջանական տանկի ոչնչացման կադրերը նույնպես հրապարակվել են Հայաստանի ՊՆ-ի կողմից: Այն որակվել է որպես պատժիչ գործողություն:

Մանրամասները՝ տեսանյութում։

Նարեկ Կիրակոսյան