24.04.2026 | 23:32
Կապանում ջրանջատում կլինի
Շիրակում կորոնավիրուսի 41 նոր դեպք է հաստատվել․ Գյումրու ինֆեկցիոնում մարզի 76 բնակիչ է բուժվում
09.07.2020 | 17:29
Գյումրու ինֆեկցիոն հիվանդանոցում հուլիսի 9-ի դրությամբ կորոնավիրուսով հիվանդ Շիրակի մարզի 76 բնակիչ է բուժվում։ Այս մասին տեղեկանում ենք Շիրակի մարզպետարանից։ Նշենք, որ երկու օրվա ընթացքում 11-ով ավելացել է ինֆեկցինոնում բուժվող մարզի բնակիչների թիվը։
Շիրակում այսօրվա դրությամբ տնային ինքնամեկուսացման ցուցում ունի 1028 քաղաքացի։ Ավելացել է նաև դրական ախտորոշում ունեցող անախտանիշ ընթացքով հիվանդների թիվը 277 (նախկին 263-ի փոխարեն)։ Նրանց հսկողությունն իրականացվում է առողջության առաջնային օղակի կողմից։
Մարտի մեկից մինչ օրս Շիրակի մարզի բուժհաստատություններում և հիվանդությունների վերահսկման և կանխարգելման ազգային կենտրոնի մարզային կենտրոնում իրականացվել է 5492 նմուշառում, մայիսի 12-ից հուլիսի 8-ը ներառյալ Գյումրիում իրականացվել է 4138 նմուշառման հետազոտություն։
Հուլիսի 8-ին հաստատվել է կորոնավիրուսային հիվանդության 41 նոր դեպք։ Նշենք, որ մարզում այս պահին վարակի ամենամեծ օջախը Գյումրին է։ Հիշեցնենք, որ օրերս Գյումրիի տարեցների տուն-ինտերնատում են կորոնավիրուսի դեպքեր հայտնաբերվել։ Խնամքի կենտրոնի 151 շահառուից 56-ի մոտ կորոնավիրուս է հաստատվել, նրանցից 37-ը հոսպիտալացված է, մահացել է 3 շահառու։ Կենտրոնի 66 աշխատակիցներից էլ 12-ն են կորոնավիրուսով վարակվել։
Մինչ օրս կորոնավիրուսից առողջացել ու հիվանդանոցից դուրս է գրվել Շիրակի մարզի 334 բնակիչ։ 45 հիվանդ տեղափոխվել է Երևան և բուժում է ստանում այնտեղ։ Մարզում, ընդհանուր առմամբ, կորոնավիրուսից մահվան 24 դեպք է արձանագրվել։
Էմմա Չոբանյան
