24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
ՍԱՏՄ-ն Գյումրիի սննդի օբյեկտներում ստուգայցեր է իրականացրել․ սրճարաններում հայտնաբերվել են խախտումներ․ ԼՈՒՍԱՆԿԱՐՆԵՐ
12.06.2020 | 19:08
Սննդամթերքի անվտանգության տեսչական մարմնի աշխատակիցներն այսօր հերթական ստուգումներ են իրականացրել Շիրակի մարզում՝ պարզելու, թե ինչքանով են պահպանվում հակահամաճարակային անվտանգության կանոններն ու պարետի որոշումները։
Գյումրիի կենտրոնական հատվածում, որտեղ մեծ թվով սրճարաններ ու հանրային սննդի տարբեր օբյեկտներ կան, ՍԱՏՄ ղեկավար Գեորգի Ավետիսյանի գլխավորությամբ ստուգումներ անցկացվեցին։
Ամենատարածված խախտումը, որ հայտնաբերվեց սրճարաններում, սեղանների միջև պատշաճ սոցիալական հեռավորության բացակայությունն է։ Այս խախտումն արձանագրվել է մի քանի սրճարանում։ Բացի այդ՝ եղել է նաև աղբամանների խնդիր։
Գյումրիի Ռիժկովի փողոցում գտնվող սրճարաններից մեկում էլ արդեն երկրորդ անգամ են խախտումներ հայտնաբերվում։ Առաջին անգամ՝ նախորդ շաբաթ, սեղանների միջև սոցիալական հեռավորությունը չպահպանելու համար 24 ժամով կասեցվել էր սրճարանի գործունեությունը։ Այժմ խախտումներն այլ են։
«Չեն գրանցել՝ ինչով են ախտահանում իրականացրել, գրանցել են հաճախորդների, որոնք բարձր ջերմություն են ունեցել։ Տեսանելի վայրում փակ աղբաման չունեն՝ նախատեսված դիմակների համար։ Կասկածելի է՝ ինչո՞ւ են գրանցել բարձր ջերմությամբ մարդկանց, եթե բարձր ջերմություն ունի, պետք է ընդհանրապես թույլ չտային ներս մտնել»,- ասաց ՍԱՏՄ ղեկավար Գեորգի Ավետիսյանը։
Նա նաև նշեց, որ պարտադիր է աշխատող անձնակազմի՝ օրական երկու անգամ ջերմաչափումն ու գրանցումը, հաճախորդների գրանցումը պարտադիր չէ։ Սրճարանը նորից կփակվի, թե՞ ոչ, կորոշի պարետատունը, իսկ եթե սանկցիա կիրառվի, նախորդի համեմատ կլինի ավելի խիստ։
Ըստ ՍԱՏՄ ղեկավարի՝ հիմնական խախտումներից են նաև դիմակի ոչ պատշաճ կրումը, մատյանների սխալ լրացումը, սոցիալական հեռավորության բացակայությունը։
Այն օբյեկտների մասով, որտեղ խախտումներ են հայտնաբերվել, տեսչական մարմնի աշխատակիցները կազմել են համապատասխան արձանագրություններ, որոնք կուղարկվեն պարետատուն։
Բացի Գյումրիից՝ ՍԱՏՄ աշխատակիցները ստուգումներ են իրականացրել նաև Շիրակի մարզի այլ բնակավայրերում։
Նշենք նաև, որ Շիրակում կորոնավիրուսի կանխարգելման աշխատանքներ իրականացնելու նպատակով, մարզպետ Տիգրան Պետրոսյանի հանձնարարականով, մարզպետարանի աշխատակիցներից մշտադիտարկման աշխատանքային խմբեր են կազմվել։ Նրանք սննդի, տեսչական ու առողջապահական մարմինների հետ միասին ամենօրյա ռեժիմով շրջում են մարզի տարբեր օբյեկտներում՝ հետևելու տնտեսական գործունեության տեսակների աշխատանքների կազմակերպմանն ու վիրուսի տարածումը կանխելուն ուղղված քայլերի իրականացմանը։
Էմմա Չոբանյան
