17.12.2025 | 21:49
Լավրովն ու Արաղչին քննարկել են Հյուսիս-Հարավի համար ռազմավարական Ռեշտ-Աստարա երկաթուղու շինարարությունը
ԱԱԾ֊ն Սեդրակ Առուստամյանին ձերբակալել է. նա ցուցմունք է տվել. ՏԵՍԱՆՅՈՒԹ
Հասարակություն
24.04.2020 | 17:05
Երեկ ԱԱԾ-ն ձերբակալել է Գագիկ Ծառուկյանին պատկանող «Մուլտի գրուպ» ընկերության տնօրեն Սեդրակ Առուստամյանին:
Գործը, ըստ մամուլի, առնչվում է ՊԵԿ նախկին նախագահ, ֆինանսների նախարար Գագիկ Խաչատրյանին, որը, հիշեցնենք, շուրջ մեկ տարի է ինչ կալանավորված է։
Խաչատրյանը մեղադրվում է պաշտոնեական լիազորությունները չարաշահելու և առանձնապես խոշոր չափերով՝ մոտ 7 մլրդ դրամի վատնում կատարելու համար։ ԱԱԾ-ից փորձեցինք մեկնաբանություն ստանալ, թե ինչ առնչություն ունի այս գործերի հետ Առուստամյանը և ինչ կարգավիճակ։
Սակայն ԱԱԾ-ից հայտնեցին, որ ձեռնպահ են մնում մեկնաբանություններ տալուց։ Առուստամյանի պաշտպան Հովիկ Սուքիասյանը Factor.am-ի հետ զրույցում պնդեց, որ ձերբակալման որոշումը անօրինական է, իրենք այն բողոքարկել են: «Երեկ ձերբակալել են, կանչել են հարցաքննության և ձերբակալել, կասկածանքն էլ անհեթեթ կասկածանք է, որը բողոքարկել ենք»,- նշեց փաստաբանը։
Պաշտպանը, սակայն, չմանրամասնեց, թե ինչ առնչություն կա Առուստամյանի և Գագիկ Խաչատրյանի գործի միջև, ասաց՝ նախաքննական գաղտնիք է: «Մանրամասն ցուցմունք տվել է պարոն Առուստամյանը, բնականաբար, կասկածանքը չի ընդունում, քանի որ, ինչպես արդեն ասացի, անհեթեթ կասկածանք է»,- եզրափակեց Սուքիասյանը։
Սեդրակ Առուստամյանը, հիշեցնենք, 2019-ի հոկտեմբերի 22-ին կալնավորվել, ապա օրեր անց գրավի դիմաց ազատ էր արձակվել «Հյուսիս-հարավի» քրեական գործով։
Ըստ Քննչական կոմիտեի՝ «Գևորգյան Քոնսալթինգ» և «ԷՄ-ԷՍ Քոնսալթինգ» ընկերությունները, գործելով «Սթոնս» ընկերության ղեկավարներ Սեդրակ Առուստամյանի, Տրանսպորտի և կապի նախկին նախարար Գուրգեն Սարգսյանի հետ, ընկերությանը, իբր, մատուցված ծառայությունների համար դուրս են գրել ընդհանուր 177 միլիոն դրամի կեղծ հարկային հաշիվներ։ Գումարի մեծ մասը փոխանցվել է Սեդրակ Առուստամյանին։ Նա, սակայն, մեղադրանքը չի ընդունում։
«Հյուսիս-հարավ»-ի գործով, հիշեցնենք, անցնում են մի շարք բարձրաստիճան պաշտոնյաներ, որոնցից մեկը Երևանի նախկին քաղաքապետ, այլ գործով հետախուզման մեջ գտնվող Գագիկ Բեգլարյանն է։ Հյուսիս-հարավի գործով հետախուզվում է նաև երրորդ նախագահ Սերժ Սարգսյանի եղբայր Լևոն Սարգսյանը։ Նա մեղադրվում է փողերի լվացման և իրական կամ ենթադրյալ ազդեցությունը շահադիտական նպատակով օգտագործելու համար։
Մանրամասները՝ տեսանյութում։
Լիլիթ Շաբոյան
