05.05.2024 | 21:52
7 ոսկի և 2 արծաթ. Հայաստանի հավաքականը ավարտեց ելույթները ուշուի ԵԱ-ում
Կարճ ժամանակում 27.000 դիմում ենք ունեցել, սերվերները չեն դիմացել. Սոնա Մարտիրոսյանը՝ 9-րդ միջոցառման բաժնի՝ կայքից անհետանալու մասին
14.04.2020 | 16:38
Կորոնավիրուսի տնտեսական հետևանքների չեզոքացման 9-րդ միջոցառման շրջանակում online.ssa.am կայքէջում համապատասխան հարթակը գործարկելուց կարճ ժամանակ անց, կեսգիշերի դրությամբ, 27.000 դիմում է ստացվել, սերվերները չեն դիմացել նման հոսքին: Factor.am-ի հետ զրույցում այս մասին ասաց ՀՀ աշխատանքի և սոցիալական հարցերի նախարարության խոսնակ Սոնա Մարտիրոսյանը՝ մեկնաբանելով հարթակը փակելու մասին հարցը:
«Չնայած նախապես հայտարարել էինք, որ հարթակը կգործի ապրիլի 15-ից, այն կարողացանք գործարկել երեկ երեկոյան: Չնայած շատ ուշ ժամին՝ երեկ կեսգիշերի դրությամբ արդեն ունեցել ենք 27.000 դիմում: Քանի որ դիմումների հոսքը ահռելի ծավալների է հասել, տեխնիկապես սերվերները չեն դիմացել: Մասնագետներն այս պահին աշխատում են այդ ուղղությամբ: Նշեմ նաև, որ այսօր ժամը 12:00-ի դրությամբ՝ ստացել ենք 52.000 դիմում, որից 31.000-ը հաստատվել է, 21.000-ը՝ մերժվել՝ չափանիշներին չհամապատասխանելու հիմքով»,- պարզաբանեց նախարարության խոսնակը:
Սոնա Մարտիրոսյանը մանրամասնեց, որ կայքում մուտքագրված քաղաքացիների տվյալներն ինքնաշխատ կերպով համադրվում են ՊԵԿ-ից ստացված տվյալների հետ՝ գործատուներից ստացած հարկերի հիման վրա ձևավորված տեղեկատվական բազայի վրա:
Նրա հավաստմամբ՝ կայքը, ամենայն հավանականությամբ, մի քանի ժամվա ընթացքում կրկին հասանելի կլինի, իսկ տեխնիկական այս խոտանը վերացնելուն զուգահեռ՝ մասնագետներն աշխատում են նաև մեկ այլ գործիքի ներդրման ուղղությամբ:
«Հիմա փորձելու ենք ներդնել մի գործիք, որը թույլ կտա շահառուներին մուտքագրել իրենց քարտերի համարները, որպեսզի գումարը փոխանցվի ոչ թե բանկի հաշվեհամարին, այլ քարտին: Դա թույլ կտա հնարավորինս խուսափել մարդկանց կուտակումներից բանկերում և չծանրաբեռնել բանկերի գործունեությունը»,- տեղեկացրեց նա:
Նշենք, որ Կորոնավիրուսի տնտեսական հետևանքների չեզոքացման 9-րդ միջոցառմամբ նախատեսվում է, որ մինչև 18 տարեկան երեխա ունեցող ծնողները, որոնք չեն ունեցել գրանցված աշխատանք 2020թ. մարտի 12-ի դրությամբ և չեն ընդունվել ժամանակավոր կամ մշտական գրանցված աշխատանքի 2020թ. մարտի 12-ից մինչև մարտի 31-ն ընկած ժամանակահատվածում, միանվագ դրամական աջակցություն կստանան՝ յուրաքանչյուր երեխայի համար 26.500 դրամի չափով:
Ինչ վերաբերում է աջակցության ծրագրի շրջանակում մյուս միջոցառումներին, Սոնա Մարտիրոսյանի փոխանցմամբ՝ հղիների համար նախատեսված ծրագրով 5.000-ից ավելի շահառու է նույնականացվել, նրանցից շուրջ 3.700-ի մասով արդեն իսկ վճարումները կատարվել են բանկերին, քաղաքացիներն արդեն կարող են ստանալ այն: 4-րդ միջոցառման շրջանակում ևս, որը վերաբերում է մինչև 14 տարեկան երեխա ունեցող, աշխատանքից ազատված ծնողներին, վճարումներն արվել են:
«Պարզապես 4-րդ միջոցառման պարագայում տվյալները դեռևս վերջնական չեն, խոսքը դարձյալ ՊԵԿ-ի տվյալների բազայի մասին է: Քանի որ նախորդ ամսվա հարկային հաշվետվությունները կարելի է ներկայացնել մինչև հաջորդ ամսվա 15-ը, ցուցակն անընդհատ համալրվում է: Դրա համար մենք քաղաքացիներին հորդորում ենք, եթե իրենց անունները չեն գտել շահառուների ցանկում, բայց վստահ են, որ իրենք շահառու են հանդիսանում, էլի փորձեն, որպեսզի արդեն թարմացված տվյալները ստուգեն»,- ամփոփեց Սոնա Մարտիրոսյանը:
