23.11.2024 | 16:53
ՏԿԵ նախարարն այցելել է Նոր Հաճնի կամուրջ, հանձնարարականներ տվել շինարարներին
5.8 մլրդ դրամի կրճատման արդյունքում առողջապահությունում կծաղկի կոռուպցիան. Արարատ Մկրտչյան
Քաղաքականություն
07.11.2017 | 18:55
Առողջապահության նախկին նախարար Արարատ Մկրտչյանը Factor.am-ի հետ զրույցում մտահոգություն է հայտնում, որ 2018-ի բյուջեում առողջապահության ծախսերի կրճատումը կարող է հանգեցնել ոլորտում կոռուպցիայի աճին: «Առողջապահությունն «ապրանք» է, որի դիմաց պետք է վճարել»,- նկատում է նախկին նախարարը՝ հավելելով, որ եթե պետությունը հրաժարվում է վճարել, այդ բեռը կրկին դրվում է քաղաքացու վրա:
«Մտնում ենք նորից քաղաքացու գրպանը: Խոսել չնչին գումարներով լավ ծրագրեր կատարելու մասին, կարծում եմ, կոռեկտ չէ»,- ընդգծում է նախկին նախարարը: Նման սոցիալ-տնտեսական իրավիճակում, Մկրտչյանի կարծիքով, չէր կարելի գնալ միջոցների այսպիսի կրճատման: «Սա տարածաշրջանում ամենանվազ հատկացումն է: Առողջապահության համաշխարհային կազմակերպության կողմից խորհուրդ է տրվում երկրներին, որոնք հոգ են տանում իրենց բնակչության առողջության մասին, առողջապահությանն ուղղվող ֆինանսական միջոցները ՀՆԱ-ի 5 տոկոսից պակաս չտրամադրել: Մինչդեռ մեր դեպքում 1.4 տոկոս միջոցներով մենք գրեթե 4 անգամ պակաս են հատկացնում»,- արձանագրում է նախկին նախարարը:
Առողջապահության ներկայիս նախարար Լևոն Ալթունյանը ևս գոհ չէ հատկացման չափից, ինչի մասին լրագրողներին ասել է ԱԺ քննարկումից հետո: Արարատ Մկրտչյանը կարծում է, որ հատկացման չափը Ալթունյանի համար նորություն չէր և պետք էր ավելի վաղ այդ մասին խոսել, քանի որ դեռ գարնանը կառավարությունը առաջիկա 3 տարվա միջնաժամկետ ծրագիր էր ներկայացրել, ըստ որի՝ հետագա 3 տարիներին պատրաստվում է կրճատել առողջապահությանն ուղղվող գումարների չափը մինչև ՀՆԱ-ի 1 տոկոս:
«Նայելով 2018 թվականի բյուջեն, մենք տեսնում ենք, որ կառավարությունը քայլեր է անում ֆինանսական միջոցների կրճատման ուղղությամբ, որ առաջիկայում մենք կունենանք հիվանդ, թերկրթված և սոցիալապես անպաշտպան հասարակություն: Թվերը, որ բերված են 2018 թ-ի բյուջեում, խոսում են դրա մասին»,- համոզված է նախկին նախարարը:
Մանրամասները դիտեք Արարատ Մկրտչյանի հետ Factor.am-ի հարցազրույցում:
Մարինե Խառատյան
