Շիրակի «Արմաթ» տեխնոհամայնքը եռաչափ տպիչներով դիմակներ է  պատրաստում ու նվիրում մարզի բուժհաստատություններին

Այս օրերին Շիրակի մարզի «Արմաթ» ինժեներական լաբորատորիայի ներկայացուցիչները եռաչափ տպիչներով պատրաստված պաշտպանիչ դիմավահանների արտադրություն են նախաձեռնել։ Նպատակը կորոնավիրուսի վարակի տարածմամբ պայմանավորված՝ մարզի բուժհաստությունների հոգսն ինչ-որ չափով թեթևացնելն է։

Ամբողջ աշխարհում եռաչափ տպիչներով պատրաստված դիմակների օգտագործումը այժմ բավական տարածված է: Ամեն օր աշխարհում 120.000-ից ավելի նման դիմակներ են արտադրվում: Այս դիմավահաններն առաջնայինը ապահովում են աչքերի անվտանգությունը, իսկ քթի ու բերանի համար լրացուցիչ պաշտպանիչ շերտ են հանդիսանում: Սակայն դրանք անհրաժեշտ է կրել բժշկական դիմակների հետ միասին:

«Տեսնելով այս իրավիճակը ու հիվանդների՝ անընդհատ ավելացող թիվը՝ մենք մտածեցինք՝ ինչ անենք, որ կարողանանք օգնել, աջակցել բժիշկներին։ Մեր ռեսուրսները գնահատելով՝ տեսանք, որ կարող ենք եռաչափ տպիչներն օգտագործել ու դիմավահաններ պատրաստել։ Առաջին փորձարկումն արեց հայկական եռաչափ տպիչ արտադրող ընկերությունը, որը մեր գործընկերն է: Քննարկումների արդյունքում հասկացանք, թե որ մոդելներն են ամենալավը և անմիջապես սկսեցինք արտադրությունը։  4-5 ժամում ինքնակազմակերպվեցինք ու սկսեցինք տպագրման գործընթացը»,- Factor.am-ի հետ զրույցում ասաց «Արմաթ» ինժեներական լաբորատորիայի Շիրակի մարզային համակարգող Սոֆյա Հարությունյանը։

Նա նշեց, որ տպիչները բաժանվել են խմբավարներին, և դիմակների արտադրությունը տանն է կազմակերպվում: Անվտանգությունից ելնելով էլ՝ լաբորատորիաների աշակերտները չեն ընդգրկվել աշխատանքներում:

Շիրակի մարզպետարանի հետ քննարկումների արդյունքում պարզվել է նաև, որ մարզում կա 150 նման դիմավահանների կարիք, ուստի արտադրական աշխատանքները շարունակվում են:

Այսօր «Արմաթ»-ի Շիրակի մարզային ներկայացուցիչները դիմակների առաջին խմբաքանակն արդեն հանձնել են մարզպետարանին։ Ըստ պայմանավորվածության՝ ախտահանման գործընթացն իրականացնելու են բուժհաստատությունները։

«Մենք 80 հատ այսօր փոխանցել ենք մարզպետարանին, 2 օրից  կփոխանցենք ևս 70-ը։ Բայց նաև մարզպետարանի կամավորների համար առանձին կփոխանցենք, ինչպես նաև Գյումրիի բժշկական կենտրոնին՝ առանձին»,- ասաց Սոֆյա Հարությունյանը։

Այս նախաձեռնությանը միանում են նաև այլ մարզերի լաբորատորիաները։ Մեծամորի բժշկական կենտրոնին էլ իր հերթին դիմավահաններ է տրամադրել Արմավիրի «Արմաթ» ինժեներական լաբորատորիայի համայքը:

Ի դեպ՝ եթե կարիք լինի  և աշխատի «Արմաթի»՝ ամբողջ հանրապետության տեխնոհամայնքը, օրական հնարավոր կլինի արտադրել 1.500 հատ պաշտպանիչ դիմավահան։

Էմմա Չոբանյան