Ընդամենը անակնկալ են մատուցել. Վահրամ Բաղդասարյանը՝ Սիսիանի քաղաքապետի ծննդյան օրվա տեսանյութի մասին

«Քնա՞ծ են, որ երեք ամիս հետո են հիշում ծննդյան օրվա մասին կամ ընտրություններից մի շաբաթ առաջ»,- այս մասին այսօր խորհրդարանում անդրադառնալով Սիսիանի քաղաքապետի ծննդյան տարեդարձը նշելու շուրջ ծավալված քննադատություններին՝ ասաց ՀՀԿ խմբակցության ղեկավար Վահրամ Բաղդասարյանը:

Պարոն Բաղդասարյանը հիշում է, որ իր 15- ամյակն էլ մեծ շուքով նշվել է: «Մի օր էլ ինձ կշահարկեն, որ 15 տարեկանն էս ինչ ճոխ է նշել Վահրամ Բաղդասարյանը»,- ասաց ՀՀԿ խմբակցության ղեկավարը:

Նրա համոզմամբ՝ Սիսիանի քաղաքապետին պարզապես անակնկալ են մատուցել:

Նշենք, որ երեկ համացանցում բուռն քննարկվում էր Սիսիանի քաղաքապետ, Հանրապետական Արթուր Սարգսյանի ծննդյան օրվա՝ ապրիլի 28-ի մասին տեսանյութը: Տեսանյութում քաղաքապետարանի աշխատողները քաղաքապետի նկարով շապիկները հագներին, փուչիկներով, ծափերով քաղաքապետարանի շենքում նշում էին Սարգսյանի ծննդյան օրը:

Այսօր խորհրդարանում «Ծառուկյան» խմբակցության պատգամավոր Նաիրա Զոհրաբյանը խորհրդարանականների ուշադրությունը հրավիրեց համացանցում տարածված տեսանյութին, որն, ի դեպ, ջնջվել է քաղաքապետարանի պաշտոնական կայքից:

«Սրանով լրջորեն պետք է զբաղվի Կառավարությունը, համայնքապետարանը. Սիսիանի քաղաքապետարանը մասկի շոու կազմակերպելու տեղ չէ, քաղաքապետարանի աշխատողներին սեփական լուսանկարով վերնաշապիկներ հագցնելու տեղ չէ: Սա լուրջ խնդիր է, ու ես զարմանում եմ, որ այդ վիդեո սյուժեն պտտվում է սոցիալական ցանցերով ու Կառավարության կողմից որևէ արձագանք նշյալ ոդևիլին չկա»,- նշել էր Նաիրա Զոհրաբյանը:

Տեղեկացնենք, որ նոյեմբերի 5-ին Հայաստանի մի շարք համայնքներում ՏԻՄ ընտրություններ են, այդ թվում՝ Սիսիան քաղաքում: Առաջադրվել են երկու թեկնածու՝ ՀՀԿ-ական Արթուր Սարգսյանը, որ նաև գործող քաղաքապետն է, և ԲՀԿ կուսակցությունից Կարեն Համբարձումյանը:

Մանրամասները՝ տեսանյութում:

Շողիկ Գալստյան