Ադրբեջանում հետընտրական ճգնաժամը խորանում է. ընդդիմության բողոքի ակցիաները շարունակվում են, իշխանության ճնշումները՝ ավելանում

Ադրբեջանում փետրվարի 9-ին կայացած խորհրդարանական արտահերթ ընտրություններից հետո ներքաղաքական լարվածությունը գնալով աճում է, հետընտրական ճգնաժամը՝ խորանում: Գրեթե ամեն օր ընդդիմադիր գործիչներն ու պատգամավորի թեկնածուները բողոքի ակցիաներ են կազմակերպում: Հերթականը տեղի է ունեցել նախօրեին: Պատգամավորի մի խումբ թեկնածուներ, այդ թվում՝  Խալիդ Բաղիրովը, Նուրլանա Ջալիլին և Սամեդ Ռահիմլին, Բաքվում ԿԸՀ-ի դիմաց բողոքի ակցիա են անցկացրել: Ակցիայի մասնակիցներն իրենց անհամաձայնությունն են հայտնել՝ կապված ընտրությունների արդյունքների հետ և Կենտրոնական ընտրական հանձնաժողովից պահանջել օբյեկտիվորեն քննել ընտրությունների ընթացքում գրանցված խախտումները:

Ոստիկանությունը դարձյալ ուժ է կիրառել և ցրել խաղաղ ակցիան: Պատգամավորի թեկնածու, հայտնի իրավաբան Խալիդ Բաղիրովը ձերբակալվել է: Ոստիկանները  ուժի գործադրմամբ Բաղիրովին մեքենա են նստեցրել ու տարել անհայտ ուղղությամբ: Մի քանի ժամ անց նրան Բաքվի ծայրամասում՝ Դրոշի հրապարակի մոտակայքում ազատ են արձակել:

Նշենք, որ Բաղիրովը մի շարք քաղբանտարկյալների իրավաբանն է, 2014 թվականին Ադրբեջանի փաստաբանների միությունն ընդդիմադիր դիրքորոշման համար կասեցրել է նրա փաստաբանական լիազորությունները: Ի դեպ՝ այդ ժամանակ Բաղիրովը ներկայացնում էր հայտնի իրավապաշտպան ու հասարակական գործիչներ Լեյլա և Արիֆ Յունուս ամուսիննների շահերը:

Բողոքի ակցայի ընթացքում ոստիկանները ուժ են կիրառել նաև պատգամավորի կին թեկնածուներ Ռաբիյա Մամեդովայի, Նուրլան Ջալիլի նկատմամբ՝ նրանց հեռացնելով տարածքից։

Հիշեցնենք, որ փետրվարի 17-ին նույնպես պատգամավորի անկախ թեկնածուները բողոքի ակցիա էին կազմակերպել ԿԸՀ-ի դիմաց՝ պահանջելով չեղարկել ընտրությունների արդյունքները։ Ոստիկանները կրկին միջամտել էին՝ ուժի կիրառմամբ թեկնածուներին թույլ չտալով մտնել ԿԸՀ ու ներկայացնել իրենց բողոքները:

Մեծամասշտաբ մի հանրահավաք էլ տեղի էր ունեցել փետրվարի 16-ին, որը կազմակերպվել էր «Մուսավաթ», «Հանրապետական այլընտրանք» կուսակցությունների, D18 շարժման, ինչպես նաև պատգամավորի մի շարք թեկնածուների կողմից: Ոստիկանությունը, սակայն, բռնի ուժի կիրառմամբ ու ճնշմամբ կասեցրել էր այն: Հանրահավաքի մեկնարկից առաջ ձերբակալվել էին կուսակցությունների ղեկավարները, հետա արդեն՝ ցույցի մասնակիցները։ Ձերբակալվածների թիվը գերազանցել է 60-ը: Իրավապահները նրանց ավտոբուսներով Բաքվից դուրս էին տարել և իջեցրել Ադրբեջանի մայրաքաղաքից մինչև 300 կմ հեռավորությամբ գտնվող ամայի վայրերում ու ավտոճանապարհներրին։

Ի դեպ՝ նախօրեին ձերբակալվել է ադրբեջանցի դիզայներ Ռասուլ Հասանը, որը նշված հանրահավաքից կադրեր օգտագործելով՝ պատրաստել ու սոցիալական ցանցերում հումորային տեսանյութ էր տեղադրել, որում ԿԸՀ-ը շրջապատած ոստիկաններն իրար ձեռք բռնած պարում են: Ադրբեջանի իշխանություններին, հավանաբար, դուր չի եկել կատակը: Հասանին ձերբակալել են սեփական տանից դուրս գալիս, իսկ ուշ երեկոյան՝ ազատ արձակել:

«Ոստիկանական բաժանմունքում նրան հարցրել են ընդդիմադիր հայացքների մասին, ստիպել են ջնջել պատրաստած տեսանյութը։ Ռասուլին նաև սպառնացել են, որ եթե ձերբակալումը հրապարակայնացվի, ապա նրա նկատմամբ ավելի խիստ միջոցներ կկիրառվեն։ Սա մարդու առևանգում է ու իրավունքների ոտնահարում»,- լրատվամիջոցների հետ զրույցում ասել է Ռասուլի հայրը՝ Էլշան Հասանը։ Նա նաև հավելել է, որ սա իր ընտանիքի անդամների նկատմամբ իշխանությունների կողմից ճնշման արդեն երրորդ դեպքն է։

Կատարվածի մասին Ռասուլ Հասանը մտադիր է տեղեկացնել Ադրբեջանում գործող օտարերկրյա դեսպանություններին:

Էմմա Չոբանյան