Բարի երեկո, պարո՛ն վարչապետ, ուրախ ենք Ձեզ տեսնել խորհրդարանում. Նիկոլ Փաշինյանի հարցը՝ ԱԺ-կառավարություն հարցուպատասխանին չներկայացած վարչապետին

Ազգային ժողով-Կառավարություն հարցուպատասխանի ժամին այսօր «Ելք» խմբակցության ղեկավար Նիկոլ Փաշինյանը որոշեց հարց ուղղել վարչապետ Կարեն Կարապետյանին՝ չնայած կառավարության ղեկավարը, ի խախտումն ՀՀ Սահմանադրության, չէր ներկայացել խորհրդարան:

«Այս դահլիճում հերյուրանքներ են հնչում, որ վարչապետ Կարեն Կարապետյանն այսօր բացակայում է Կառավարություն-Ազգային ժողով հարցուպատասխանից: Ես չեմ կարող հավատալ նման սադրիչ լուրերին: Ես նույնիսկ անվսհատություն եմ հայտնում սեփական աչքերիս, որոնք ակնհայտ սխալ տեղեկատվություն են փոխանցում, որովհետև ՀՀ Սահմանադրության 1-ին հոդվածում ասված է՝ Հայաստանի Հանրապետությունն իրավական պետություն է, իսկ Սահմանադրության 80-րդ հոդվածն արձանագրել է՝ եթե որևէ մեկը ՀՀ վարչապետ է, այսօր այս ժամին երկրագնդի վրա բացի այստեղից իրավունք չունի ուրիշ որևէ տեղ գտնվել»,- նշեց ընդդիմադիր խմբակցության ղեկավարը, ապա հարց հնչեցրեց՝ ուղղված Կարեն Կարապետյանին:

«Բարի երեկո, պարոն վարչապետ, ուրախ ենք Ձեզ տեսնել խորհրդարանում, ուրախ ենք, որ Դուք տիրապետում եք Ձեր սահմանադրական պարտականություններին: Մամուլում լուրեր են շրջանառվում, որ Դուք Սերժ Սարգսյանի հետ հանդիպել եք և պայմանավորվել, որ նա պետք է լինի վարչապետ, իսկ Դուք՝ փոխվարչապետ: Խնդրում եմ պարզաբանել այս լուրերը»,- դիմելով բացակա վարչապետին՝ հեգնեց Փաշինյանը:

Այս իրավիճակից փոքր-ինչ շփոթված ԱԺ նախագահ Արա Բաբլոյանը նախ հայտարարեց, որ Փաշինյանի հարցին կպատասխանի կառավարության վարչապետ Կարեն Կարապետյանը, ապա հորդորեց պատգամավորին հարցը գրավոր ուղարկել:

Մանրամասները՝ տեսանյութում:

Շողիկ Գալստյան