«Հայաստանում ուր գնում ես, մարդիկ համատարած ազատված են բանակից՝ մեկը ականջի խրոնիկ մեծացում ունի, մյուսը՝ պճեղի մենինգիտ».Նիկոլ Փաշինյան

«Հայաստանում Զինված ուժերի հետ հարաբերություններում կան երեք խումբ մարդիկ: Առաջին խումբն այն մարդիկ են, որոնք Զինված ուժերի հետ ունեն օրինական հարաբերություններ՝ և՛ դե ֆակտո, և՛ դե յուրե, երկրորդ խումբ մարդիկ դրանք արտոնյալներն են, ովքեր դե յուրե օրինական հարաբերությունների մեջ են, բայց դե ֆակտո կարողանում են իրենց երեխաներին բանակ չուղարկել: Պետք է խոստովանել, որ այս երկրորդ խումբ արտոնյալների կարևոր գործիքներից մեկը բուհական համակարգն է՝ իր կոռուպցիայով», – զինվորական ծառայության և զինծառայողների կարգավիճակի մասին օրենքի նախագծի քննարկման ժամանակ այսօր հայտարարեց ԱԺ «Ելք» խմբակցության ղեկավար Նիկոլ Փաշինյանը:

Նա տեղեկացրեց, որ վերջերս հարցում է ուղարկել Պաշտպանության նախարարություն, որի պատասխանը գաղտնի է, ուստի թվերը չի կարող հրապարակել, բայց ստացած տպավորություններով կիսվեց. «Հայաստանում ահավոր մեծ թվով մարդ ազատվում է բանակից ամեն տարի, ամեն զորահավաքին, նույնիսկ այդ թիվն այնպիսին է, որ նայում ես, չգիտես՝ հավատա՞ս աչքերիդ, թե՞ ոչ։ Բայց բանակից 100 ազատվողներից 90-ը ազատվում է առողջական խնդիրների պատճառով և միայն 10-ը՝ ակադեմիական տարկետումով։ Շատ լավ՝ էս վերջիններից, համաձայն եմ, արտոնյալների խմբի ազատվողներն են, էն իննսունի կեսը թող լինեն իրոք հիվանդ, էն 45-ը կոռուպցիոն ոլորտն ա։ Հայաստանում ուր գնում ես, մարդիկ համատարած ազատված են բանակից՝ մեկը ականջի խրոնիկ մեծացում ունի, մյուսը՝ պճեղի մենինգիտ»,- ասած Փաշինյանը։

Մանրամասները՝ տեսանյութում:

Շողիկ Գալստյան