14.07.2026 | 14:42
Ռումինիա․ Էլինա Ավանեսյանը հաղթեց առաջին շրջանում
1-ական դրամ՝ որպես փոխհատուցում վիրավորանքի և զրպարտության համար. ՀՅԴ-ի պահանջը Արման Բաբաջանյանից. ՏԵՍԱՆՅՈՒԹ
Քաղաքականություն
31.01.2020 | 14:00
Արդեն ունենք դատարանի որոշումը՝ ԱԺ պատգամավոր Արման Բաբաջանյանի դեմ ՀՅԴ հայցադիմումը վարույթ ընդունելու վերաբերյալ, գործը կքննվի Երևան քաղաքի ընդհանուր իրավասության դատարանում: Այսօր հրավիրված ասուլիսում ասաց փաստաբան Հայկուհի Սեդրակյանը՝ նշելով, որ խոսքը ՀՀ Քաղաքացիական օրենսգրքի 1087.1 հոդվածով նախատեսված հիմքերի մասին է՝ վիրավորանք և զրպարտություն:
Նա, միաժամանակ, հավելեց, որ առաջին դատական նիստի օր դեռևս նշանակված չէ:
«Ինչ վերաբերում է հայցադիմումի փաստական հիմքերին, խոսքը վերաբերում է պատասխանողի կողմից դեկտեմբերի 6-ին ԱԺ ամբիոնից հնչեցված ելույթին և դրանում տեղ գտած արտահայտություններին»,- ասաց Հայկուհի Սեդրակյանը:
Հայցադիմումի խնդրամասը, ըստ փաստաբանի, բաղկացած է երեք մասից. «Մասնավորապես, վիրավորանքի համար մենք պահանջում ենք հրապարակային ներողություն և խորհրդանշական 1 դրամ փոխհատուցում։ Զրպարտության համար՝ ևս 1 դրամ փոխհատուցում»:
Անդրադառնալով Արման Բաբաջանյանի հայտարարությանը, որ ինչ-որ գումարի ակնկալիքով են դատարան դիմել, փաստաբանը կրկնեց, որ խոսքը խորհրդանշական փոխհատուցման մասին է: «Քաղաքացիական օրենսգիրքն ավելի մեծ փոխհատուցում է նախատեսում նման դեպքերի համար՝ 1 միլիոն և 2 միլիոն դրամ: Այս հայցադիմումի շրջանակում մեզ չի հետաքրքրում դրամական փոխհատուցումը: Շատ ավելի կարևոր է փաստի արձանագրումը, ինչի համար դիմել ենք դատարան»,- ասաց Սեդրակյանը:
ՀՅԴ Հայաստանի Գերագույն մարմին անդամ Արծվիկ Մինասյանն էլ նշեց, որ պատվի, արժանապատվությանն ու բարի համբավին հասցված վնասն անչափելի ու անգնահատելի է:
«Հետևաբար՝ մեզ համար սկզբունքային նշանակություն ունի փաստի արձանագրումը, այնպիսի նախադեպեր ստեղծելը մեր երկրում, որպեսզի հաճախ, երբ փորձ է արվում ներկայացնել, թե ինչու, այնուամենայնիվ, իրավական պետության մեջ դատական կարգով պաշտպանության մեխանիզմներ չեն գործում մեր երկրում, նպաստենք նաև, որ ստեղծվեն այդպիսի հիմքերը: Մենք ակնկալում ենք և ուրախ կլինենք Արման Բաբաջանյանին տեսնելու դատարանում՝ իր պնդումները հիմնավորող ապացույցներ ներկայացնելու»,- ասաց Արծվիկ Մինասյանը։
Մանրամասները՝ տեսանյութում:
