13.10.2026 | 20:44
Ծանրորդ Սեյրան Խուդանյանը՝ բրոնզե մեդալակիր. Մ23 տարեկանների ԵԱ
Իրանը ցանկանում է ֆրանսիական կամ ամերիկյան սարքավորումներով վերծանել սև արկղերի տվյալները
Քաղաքականություն
22.01.2020 | 11:32
Իրանը դիմել է ԱՄՆ-ին ու Ֆրանսիային` խնդրելով հատկացնել սարքեր, որոնց օգնությամբ հնարավոր կլինի ներբեռնել ուկրաինական կործանված մարդատար օդանավի սեւ արկղերում պարունակվող տեղեկությունները. հաղորդում է amerikayidzayn.com-ը:
Այս քայլը նորից կարող է առաջ բերել միջազգային համայնքի մոտ տարակուսանք այն մասին, թե ինչու է Թեհրանը դժկամություն ցուցաբերում ձայնագրություններն արտասահմանյան փորձագետներին հանձնելու հարցում:
Կանադան, որը կործանված օդանավում կորցրել է իր 57 քաղաքացիներին, հայտարարել է, որ սեւ արկղերի տվյալներով պիտի զբաղվի Ֆրանսիան, քանի որ Ֆրանսիան այն մի քանի պետություններից է, որն ունի այդ տվյալները վերծանելու կարողություն:
Սակայն Իրանը մինչ այժմ այս հարցով չի տվել սպառիչ ու վերջնական պատասխան: Այն արդեն երկար ժամանակ է գտնվում ԱՄՆ-ի հետ լարված հարաբերությունների մթնոլորտում: Իր միջուկային ծրագրի շուրջ առկա լարվածության պատճառով էր, որ այս ամսվա սկզբին իրականացվեցին օդային գրոհներ ընդդեմ ամերիկյան ռազմաբազաների, ինչին նախորդել էր անօդաչու թռչող սարքով Իրանի գեներալներից Ղասեմ Սոլեյմանիի սպանությունը: Գեներալի սպանությունից հետո էր, որ Իրանը սխալմամբ հարվածեց ուկրաինական մարդատար օդանավին:
Իրանը երկար տարիներ է գտնվում ամերիկյան պատժամիջոցների ներքո, ինչը կրճատում է նոր օդանավեր ու այլ սարքաովորումներ գնելու այս երկրի հնարավորությունները: Այդ պատճառով է Իրանն այսօր տեխնիկական սարքավորումներ խնդրում Ֆրանսիայից:
Իրանը հաղորդում է, որ սարքավորումներ ստանալու իր դիմումը դեռեւս պատասխան չի ստացել ոչ ԱՄՆ-ից եւ ոչ էլ Ֆրանսիայից:
